Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 185 Hüküm no: 173 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Kurd’un vefat eden babasından intikal eden Of’un Balaban köyündeki emlâk hissesini Mehmed Beşe’ye satması Vilâyet-i Anadolu’da Trabzon sancağında Of kazâsına tâbi‘ Balaban nâm karye ahâlîsinden iken bundan akdem vefât eden Kurd b. Receb[‘in] verâseti sulbî kebîr oğulları Osman ve Süleyman’a münhasıra olduğu şer‘an sâbit oldukdan sonra mezbûr Osman meclis-i şer‘-i şerîfde bâ‘isü’l-kitâb Mehmed Beşe b. Kara Ali nâm kimesne mahzarında ikrâr-ı tâm ve takrîr-i kelâm edip karye-i mezbûrede vâki‘ hudûdu beynimizde ma‘lûm mülk menzilden nısf hisse-i şâyi‘amı beş kıt‘a esedî guruşa mezbûr Mehmed Beşe’ye bey‘ ve yine karye-i mezbûre sınırı dâhilinde vâki‘ hudûd ve kat‘ı beynimizde ma‘lûm bahçe ve tarladan nıfs hisse-i şâyi‘anın hakk-ı tasarrufunu ma‘rifet-i sâhib-i arz ile mezbûr Mehmed Beşe’ye meccânen ferâğ ve tefvîz, ol dahi iştirâ ve kabûl ve tefevvüz etdiğinden sonra semen-i mezbûr beş kıt‘a esedî guruşdan mezbûr Mehmed Beşe zimmetini ibrâ edip menzil-i mezbûrdan nısf hisse-i şâyi‘amı mahallinde kabza ve mârrü’z-zikr bahçe ve tarlanın nısf hisse-i şâyi‘asını zabt ve tasarrufa tarafımdan mezbûr Mehmed Beşe’yi taslît eyledim ba‘de’l-yevm menzil-i mezbûrun nısf hisse-i şâyi‘ası mülk-i müşterâsıdır, keyfe mâ yeşâ ve yahtâr ve arâzi ve bahçenin nısf-ı şâyi‘leri hakk-ı müfevvezidir. Emsâli gibi mutasarrıf olsun dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’t-tâsi‘ min-Recebi’l-ferd li-sene ihdâ ve semânîn ve elf. Şuhûdü’l-hâl: İbrahim Çelebi b. Ahmed, Abdi Çelebi b. Hüseyin, Şükrullah Bey b. Mustafa, Veli b. Mahmud.