İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 110 Hüküm no: 19 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Solaklardan Ahmed Bey b. Mustafa’nın İsmail Çavuş b. Bali’ye kölesine emanet ettiğine dair davasını delillendiremediği Dergâh-ı âlî solaklarından altmış üçüncü odası neferâtından Ahmed Bey b. Mustafa nâm kimesne meclis-i şer‘-i hatîrde bâ‘isü’l-vesîka İsmail Çavuş b. Bali nâm kimesne mahzarında da‘vâ ve takrîr-i kelâm edip târih-i kitâbdan dört sene mukaddem Efrenciyyü’l-asl Hüseyin nâm gulâmı mezbûr İsmail Çavuş’a emânet vaz‘ ve teslîm ol dahi minvâl-i muharrer üzere alıp kabz ve tesellüm etdikden sonra gulâm-ı mezbûru târih-i kitâbdan iki sene mukaddem merkūm İsmail Çavuş’dan taleb eylediğimde ba‘de’l-inkâr bana hufyeten ben gulâm-ı mezbûru sana teslîm ederim birkaç gün te’hir eyle teslîm etmezsem zevcem talâk-ı selâse ile mutallaka olsun demiş idi. Hâlâ gulâm-ı mezbûru merkūm İsmail Çavuş’dan taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyin beyyine taleb olundukda ityân-ı beyyineden izhâr-ı acz edip istihlâf etmeğin mezbûr Ahmed Bey dört sene mukaddem kendiye zikri mürûr eden gulâmı teslîm ve iki sene mukaddem taleb eyledikde birkaç gün te’hir ile vermez isem zevcem mutallaka olsun demediğine mezbûr İsmail Çavuş’a yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin müdde‘î-i mezbûr mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sânî min-şehri Recebi’l-mürecceb li-sene isneyn ve seb‘în ve elf. Şuhûdü’l-hâl: Ahmed Çelebi b. Mahmud, Ali Çelebi b. Osman, Kösece Osman Çelebi b. Mehmed, Şükrullah Beşe b. Mustafa, Abdi Çelebi b. Hüseyin, Baba Resül b. Rıdvan