İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 110 Hüküm no: 20 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun bt. Abdülmennan’ın Tophane’deki ev enkazını ve arsasını Dilaver Ağa b. Abdülmennan’a sattığı Mahrûse-i Galata muzâfâtından kasaba-i Tophâne’de Sakabaşı mahallesinden Fâtıma Hatun bt. Abdülmennan tarafından husûs-ı âti’z-zikre vekîl olup mezbûrenin zâtını ma‘rifet-i şer‘iye ile ârifân Nasuh Bey b. el-Hâc Abdurrahman ve el-Hâc Osman b. Abdülhalim şehâdetleri ile şer‘an vekâleti sâbite olan Siyavuş Bey b. Abdullah el-cündî meclis-i şer‘de işbu kitâbın sahibi umdetü’l-a‘yân el-Hâc Dilaver Ağa b. Abdülmennan tarafından zikri âtî husûsu tasdîka vekîl olup nehc-i şer‘î-i mu‘teber üzere vekâleti sâbite olan Sefer Ağa b. Mustafa mahzarında bi’l-vekâle ikrâr ve i‘tirâf edip müvekkilem mezbûre Fâtıma Hatun senede merhûm Yahya Paşa Vakfı’na bin seksen akçe ve merhûme Hasna Hatun Vakfı’na üç yüz altmış akçe mukāta‘a ile taht-ı tasarrufunda olup mahmiye-i İstanbul’da Bostancıbaşı Aliağa mahallesinde vâki‘ bir tarafdan ba‘zan Yesârî Mustafa Efendi tasarrufunda olan menzil ve ba‘zan mezbûr[e] Hasna Hatun Vakfı ve bir tarafdan Üveys Ağa veresesinin mülklerine ve iki tarafdan tarîk-i âm ile mahdûd muhterik menzil arsası üzerinde mevcûd mülküm olan enkāzı mezbûr[u] Hacı Dilaver Ağa’ya yirmi bin akçeye bâtten bey‘ ve teslîm ol dahi vech-i muharrer üzere iştirâ ve kabz ve tesellüm ve kabûl eyledikden sonra arsa-i mezbûreyi dahi vakfeyn-i mezbûreyn mütevellîsi ile merkūm Dilaver Ağa’ya yüz bin fıddî râyic fi’l-vakt akçe bedel mukābelesinde ferâğ ve tefvîz ol dahi vech-i muharrer üzere tefevvüz ve kabûl eyledikden sonra semen-i mezbûr yirmi bin akçe ve bedel-i mezkûr yüz bin akçe ki cem‘an yüz yirmi bin akçeyi merkūm el-Hâc Dilaver Ağa yedinden bi’t-tamam ahz u kabz eyledim. Ba‘de’l-yevm zikrolunan enkāz mülk-i müşterâsı ve arsa-i mesfûre hakk-ı müfevvazı olmuşdur. Merkūm Dilaver Ağa mutasarrıf olsun dedi dedikde gıbbe’t-tasdîkı’ş’şer‘î mâ-vaka‘a bi’t-taleb ketb olundu. Fi’l-yevmi’s-sânî min-şehr-i Recebi’l-ferd li-sene isneyn ve seb‘în ve elf. Şuhûdü’l-hâl: Fahrü’l-müderrisîn Mustafa b. Ahmed, fahrü’l-kuzât Hüseyin Efendi el-Burûsî, fahrü’l-müderrisîn Abdülkadir Efendi, eş-Şeyh Mustafa Efendi, efdalü efâzılü’l-müderrisîni’l-kirâm Mustafa Efendi, Seyyid Mehmed Çelebi.