İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 111 Hüküm no: 21 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dilaver isimli kölenin sahibi Ahmed Beşe b. Receb’e verilmesi Dîvân-ı kāimmakām sadrazamîde ma‘kūd meclis-i şer‘de işbu bâ‘isü’l-vesîka Ahmed Beşe b. Receb nâm kimesne Mehmed b. Receb ve diğer Mehmed b. Mehmed ve diğer Mehmed b. Hüseyin nâm kimesneler mahzarlarında üzerlerine takrîr-i da‘vâ edip işbu hazır bi’l-meclis Dilaver b. Abdullah nâm şabb-ı emredi bundan akdem seksen beş esedî guruşa iştirâ edip abd-i memlûküm iken târih-i kitâbdan bir ay mukaddem mezbûrlar abd-i mezbûr Dilaver’i ayardıp menzilimden ihrâc etmişler idi hâlâ yedlerinde buldum suâl olunup bana teslîm olunması matlûbumdur dedikde gıbbe’s-suâl ve akībe’l-inkâr müdde‘î-i mezbûrdan sıdk-ı makāline mübeyyin beyyine taleb olundukda udûl-i ricâlden Müezzinbaşı Mehmed Efendi b. ( ) ve Mehmed b. Yusuf ve Oruc b. İsmail ve Bayram b. İsmail nâm kimesneler meclis-i şer‘e li-ecli’ş-şehâde hâzırûn olup isre’l-istişhâdi’ş-şer‘î fi’l-vâki‘ işbu hazır bi’l-meclis mezbûr Dilaver’i mezbûrûn Mehmed ve diğer Mehmed ve Mehmed nâm kimesneler müdde‘î-i mezbûrun mülkünde iken ayardıp menzilinden ihrâc eylediler merkūm Dilaver müdde‘î-i mersûm Ahmed Beşe’nin abd-i memlûküdür biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-tasdîk ve’t-tezkiye şehâdetleri makbûle oldukdan sonra mûcebince abd-i mezbûr Dilaver’i müdde‘î-i merkūm Ahmed Beşe’ye teslîme tenbîh birle mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Cemâyizelâhire li-sene isneyn ve seb‘în ve elf. Şuhûdü’l-hâl: Ahmed Efendi el-imâm, Cebeciler çavuşu, el-Hâc Mehmed b. Ahmed, Ali Ağa kethudâ, Mehmed Ağa ser-muhzırîn, Mehmed Beşe b. Hüseyin.