İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 112 Hüküm no: 22 Orijinal metin no: [2a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ataullah Ağa b. Abdürrezzak Efendi ile kardeşinin oğlu Şeyh Mehmed Çelebi’nin babalarından intikal eden evi yapılan keşif sonucu bölüştükleri Mahmiye-i İstanbul’da Ayasofya-i kebîr Câmi‘-i şerîfi kurbünde vâki‘ İshakpaşa mahallesi sükkânından fahrü’l-emâsil ve’l-a‘yân bâ‘is-i hâze’l-kitâb Ataullah Ağa b. Abdürrezzak Efendi meclis-i şer‘-i hatîrde takrîr-i kelâm ve bast-ı merâm edip mahalle-i mezbûrede vâki‘ bir tarafdan Na‘lbend Mustafa Vakfı ve bir tarafdan Kurt Bey Vakfı ve iki tarafı tarîk-i âm ile mahdûd hâriciye ve dâhiliyede tahtânî ve fevkānî büyûtu müştemil olup arsasının senede merhûm İshak Paşa Mescid-i şerîfinin kandili vakfının yirmi akçe mukāta‘ası olup binâsı mülk olan menzil babam mezbûr Abdürrezzak efendinin tasarrufunda iken bin yirmi yedi senesinde bi’l-külliye muhterik olup arsa-i sırfa kaldıkda yine babam mezbûr Abdürrezzak Efendi mâlıyla nefsi’çün müceddeden binâ edip ba‘dehû bin otuz bir senesinde babam mezbûr vefât etdikde bi-hasebi’l-irsi’ş-şer‘î ebniye-i memlûkenin nısfı bana ve nısf-ı âharı li-ebeveyn karındaşım Lütfullah’a intikāl etdikden sonra mezbûr Lültfullah dahi vefât edip hissesi sulbî kebîr oğlu eş-Şeyh Mehmed Çelebi’ye intikāl etmekle müşâ‘a tasarruf üzere iken hâlâ menzil-i mezbûrun benim hisseme isâbet eden arsasının üzerinde olan eski binâyı hedm ve hissemle müceddeden binâ murâd etmekle menzil-i mezbûrun arsasını karındaşım oğlu mezbûr eş-Şeyh Mehmed Çelebi ile iktisâm murâd etmekle cânib-i şer‘den üzerine varılıp keşf ve mu‘âyene olundukdan sonra her birimizin hissesi ifrâz ve ta‘yîn olunmak matlûbumdur dedikde kıbel-i şer‘den Mevlânâ Keşfî Mustafa Efendi irsâl olunup ol dahi hâssa mi‘mârlarından Üstâd Ali b. Abdullah ve zeyl-i kitâbda mastûrü’l-esâmî olup ebniye ve sukūf ahvâline vukūfı ve şu‘ûru olan Müslimîn ile menzil-i mahdûd-ı mezbûrun üzerine vardıklarında mi‘mâr-ı merkūm menzil-i mersûmun arsasına mersûm eş-Şeyh Mehmed Çelebi ve vakf-ı mezbûr mütevellîsi Mahmud Çelebi muvâcehelerinde mesâha eyledikde menzil-i mezbûrun mecmû‘ arsası bennâ zirâ‘ıyla tûlen ve arzan bi-hesâb-ı şatrancî iki yüz dört zirâ‘ olmağla bâlâda mezkû[r] olan Kurt Bey tarafında vâki‘ bennâ zirâ‘ıyla tûlen ve arzan bi-hesâb-ı şatrancî yüz iki zirâ‘ arsa-i merkūm eş-Şeyh Mehmed Çelebi’nin hissesine isâbet edip tarîk-i âm tarafında olan kezâlik bennâ zirâ‘ıyla tûlen ve arzan bi-hesâb-ı mezbûr yüz iki zirâ‘ arsa müşârün-ileyh Ataullah Ağa’nın hissesine isâbet edip bu minvâl üzere mütevellî ve rızâları ile iktisâm ve beynlerinde alâmât-ı fâsıla vaz‘ edip her birine mütevellî-i merkūm dahi minvâl-i muharrer üzere temessük verdikden sonra her biri hisse-i mu‘ayyenelerini bi’t-terâzi kabz ve kabûl eylediklerini mevlânâ-yı mezbûr mahâllinde tahrîr ba‘dehû ma‘an irsâl olunan Hasan b. Bayram ile meclis-i şer‘e gelip alâ-vukû‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-Cemâyizelâhire li-sene isneyn ve seb‘în ve elf. Şuhûdü’l-hâl: Ali Efendi b. Ahmed imâm-ı Ayasofya-i kebîr, fahrü’l-eşbâh Şaban Ağa b. Süleyman kethudâ-yı teberdârân, Mustafa Efendi b. Mehmed el-imâm, el-Hâc Bayram Ağa b. Osman, Zülfika[r] Ağa kethudâ-yı cebeciyân, Yakub Efendi b. İsmail, İbrahim Bey b. Hasan, Mustafa Bey b. İsmail, Şaban Beşe b. Mehmed, Şâtır Ali Bey b. Abdünnebi, Mustafa Çelebi b. Ahmed, diğer Mustafa Çelebi b. Ahmed.