İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 113 Hüküm no: 24 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacda vefat eden Hüseyin b. Mehmed’in muhallefatını varislerinin Süleyman b. Mehmed’den aldıkları Mahmiye-i İstanbul’da Çukur mahallede sâkin olup bundan akdem tarîk-i hâcc-ı şerîfde vefât eden el-Hâc Hüseyin b. Mehmed’in verâseti zevce-i metrûkesi Safiye bt. Şaban ve sulbî kebîr oğlu Mehmed ile sulbiye kebîre kızları Âişe ve Fâtıma’ya münhasıra oldukdan sonra mezbûretân Âişe ve Fâtıma asâleten ve mezbûre Mehmed dahi kendi tarafından asâleten ve vâlidesi merkūme Safiye tarafından husûs-ı câ’îye vekîl olup bi-mâ hüve nehcü’s-sübût vekâleti sâbite olmağla vekâleten meclis-i şer‘de müteveffâ-yı mezbûrun bi’l-emâne muhallefâtına vâzı‘u’l-yed olan hâfızü’l-vesîka el-Hâc Süleyman b. Mehmed mahzarında her biri ikrâr ve i‘tirâf edip mezbûr el-Hâc Süleyman bizlere îsâl ve teslîm için kalîl ve kesîr mûrisimiz müteveffâ-yı mezbûr el-Hâc Hüseyin’in bi’l-emâne kabz eylediği muhallefâtını yedinden kabz edip muhallefâtından yedinde bir şey bâkī kalmadı dediklerinde gıbbe’t-tasdîk mâ-vaka‘a bi’t-taleb ketb olundu. Fi’l-hâmis min-Recebi’l-ferd li-sene 1072. Şuhûdü’l-hâl: Hüseyin Efendi el-Burûsî el-kâtib, Abdülkadir Efendi el-kâtib, Keşfî Mustafa Efendi el-kâtib, Ahmed Çelebi b. Mahmud kethudâ-yı muhzırîn, Abdi Çelebi b. Hüseyin.