İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 114 Hüküm no: 25 Orijinal metin no: [2b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Petekhan? bt. Mustafa’nın ev satışından kalan parasını Ahmed Beşe b. Veli’den aldığı Medîne-i Galata hâricinde Cihangir kurbünde Alaca Mescid mahallesinde sâkine Petekhan? bt. Mustafa nâm hatun meclis-i şer‘de bâ‘isü’l-vesîka Ahmed Beşe b. Veli nâm kimesne mahzarında ikrâr ve takrîr-i kelâm edip mahalle-i mezbûrede vâki‘ beyne’l-ahâlî ve’l-cîrân ma‘lûmü’l-hudûd mülk menzilimi tarafeynden îcâb ve kabûlü hâvi bey‘-ı bâtt-ı sahîh-i şer‘î ile mezbûr Ahmed Beşe’ye elli beş bin akçeye bey‘ ve teslîm ol dahi minvâl-i muharrer üzere iştirâ ve tesellüm ve kabûl ve kabz eyledikden sonra mukaddemâ semenini yedinden alıp kabz eylediğimde iki bin akçesi zimmetinde bâkī kalmış idi deyü mezbûr Ahmed Beşe’den da‘vâ ve taleb eylediğimde ol dahi inkâr etmeğin beynimizde münâza‘ât-ı kesîre vâki‘a olmuş idi. El-hâletü-hâzihi vesâtet-i muslihîn ile da‘vâ-yı mezbûreden benimle mezbûr Ahmed Beşe bin akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezkûr bin akçeyi yedinden tamamen alıp kabz edip husûs-ı mezbûre müte‘allika vechen mine’l-vücûh da‘vâ ve nizâ‘ım kalmayıp mezbûrun zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’r-râbi‘ min-Recebi’l-ferd li-sene isneyn ve seb‘în ve elf. Şuhûdü’l-hâl: Mehmed Çelebi b. Mustafa, el-Hâc Ahmed b. Mahmud, Abdi b. Hüseyin, Rasûl b. Rıdvan, Veli b. Mahmud