İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 115 Hüküm no: 26 Orijinal metin no: [2b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacda ölen Mehmed’e ait terekenin eksik teslim edildiği iddiasıyla Ali b. Mehmed’e varislerinin açtığı dava Mahmiye-i İstanbul’da Sultan Selim kurbünde Sakızağacı mahallesinde sâkin İsmail b. Mustafa nâm kimesne meclis-i şer‘de mahmiye-i mezbûrede vâki‘ Saray-ı atik-i sultanîde dolabcı tâifesinden râfi‘-i hâze’l-kitâb el-Hâc Ali b. Mehmed mahzarında üzerine da‘vâ ve takrîr-i kelâm edip karındaşım olup tarîk-i hâcc-ı şerîfde vefât eden el-Hâc Mehmed’in mezbûr el-Hâc Ali tarîk-i mezbûrda refîki olmağla hîn-i vefâtından cümle eşyâsını ahz u kabz etmeğin işbu yedime def‘ eylediği defter mûcebince üç yüz kırk beş guruşluk eşyâyı Medîne-i münevvere’de bey‘ edip semenini bana getirip teslîm eylemişdir. Lâkin defter-i mezbûrdan hâric karındaşım yedinde bi-tarîkı’l-emâne mevzû‘ olan yüz yirmi guruşluk emti‘ayı dahi kabz edip yedinde kalmışdır suâl olunup alıverilmek taleb ederin dedikde gıbbe’s-suâl mezbûr el-Hâc Ali cevâbında yedimde karındaşının bir bıçağı ile bir kuşağından gayri bir şey yokdur deyü inkâr edicek müdde‘î-yi mezbûrdan müdde‘âsını mübeyyin beyyine taleb olundukda ityân-ı beyyineden izhâr-ı acz ile istihlâf etmeğin müteveffâ-yı mezbûrun yedinde emânet olan emti‘a-i mezbûreyi ba‘de vefâtihî ahz u kabz etmeyip ve sâir eşyâsından bir bıçak ve bir kuşakdan mâ‘adâ yedinde bir şey kalmayıp ve bir vechile müdde‘î-yi mezbûre üzerine reddi lâzım hak olmadığına mezbûr el-Hâc Ali’ye yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin bilâ-beyyine mu‘ârazadan men‘ birle mâ-vaka‘a bi’t-taleb ketb olundu. Fi’s-sâmin min-Recebi’l-ferd li-sene 1072. Şuhûdü’l-hâl: es-Sâbıkūn.