İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 115 Hüküm no: 27 Orijinal metin no: [2b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bağdat valisi Mustafa Paşa b. Mehmed Ağa’nın İstanbul’da ki evini karısı Kaya Hatun’a hibe ettiği Husûs-ı âti’l-beyânın mahâllinde tahrîri bi’l-iltimâs kıbel-i şer‘îat-i mezbûreden irsâl olunan Mustafa Efendi b. eş-Şeyh Mehmed zikri âtî menzile varıp zeyl-i vesîkada isimleri mastûr olan Müslimîn huzûrlarında akd-i meclis-i şer‘-i hatîr eyledikde hâlâ Bağdad-ı behişt-âbad vâlîsi olan düstûrü’l-mükerrem-i zî şân vezîr-i mufahham-ı âlî mekân râkib-i huyûlü’l-mecd ve’l-iclâl sahib-i züyûlü’l-izzi ve’l-ikbâl zü’l-izzi’l-ûlâ ve’ş-şân el-Hâc ‘izzetli Mustafa Paşa b. Mehmed Ağa taraf-ı bâhirü’ş-şereflerinden husûs-ı âtî<>yi ikrâra vekîl olup vekâleti kıdvet-i erbâbü’t-tahrîr ve’l-kalem Abdullah Efendi b. Receb efharü’l-a‘yân Mahmud Çelebi b. Abdi nâm kimesneler şehâdetleri ile şer‘an sâbite olan umdetü’l-a‘yân ve zübdetü’l-erkân Mehmed Ağa b. Ahmed meclis-i ma‘kūd-ı mezbûrda mûmâ-ileyh Mustafa Paşa’nın halîle-i celîleleri hâfızatü hâzihi’l-vesîka umdetü’l-muhadderât-ı mükerremât zübdetü’l-muvakkarât’il-mu‘azzâmat Kaya Hatun bt. Abdülvahhab tarafından ikrâr-ı âtîyi tasdîka vekîl olup bi-mâ hüve nehcü’s-sübût-ı şer‘î vekâleti sâbite olan fahrü’l-eşbâh Mustafa Çelebi b. Hızır mahzarında bi’l-vekâle ikrâr ve i‘tirâf edip müvekkilim mûmâ-ileyh silk-i mülkünde münselik olup mahmiye-i İstanbul’da İskender Paşa mahallesinde vâki‘ bir tarafı mûmâ-ileyhâ Kaya Hatun mülküne ve üç tarafı müvekkilim mûmâ-ileyh mülküne müntehî fevkānî birbirine karşı ocaklı iki oda ve bir orta ve bir sofa bir yan sofalı ve bir dolabı ve bir dehlizi ve bir fevkānî hamam ma‘a çâmeken ve hamama muttasıl bir oda bir hazîne odasını ve tahtında kebîr bir ahır içinde bir su kuyusunu hâvî hâriciye ta‘bîr olunur müfrez işbu mülk menzilini cemî‘ tevâbi‘ ve levâhıkı ve kâffe-i hukūk ve merâfıkı ile ba‘de’t-tahliye mûmâ-ileyhâ Kaya Hatun’a hîbe-i sahîha-i şer‘iye ile hîbe ve temlîk ve teslîm edip ol dahi meclis-i hîbede ittihâb ve kabûl ve kabz eyledikden sonra ba‘de’l-yevm menzil-i mahdûd-ı mezkûr mûmâ-ileyhâ Kaya Hatun’un mülk-i mevhûbudur vechen mine’l-vücûh ve sebeben mine’l-esbâb menzil-i mezkûrda benim için hak ve alâkam kalmadı dedi dedikde gıbbe’t-tasdîk vâki‘ hâli mevlânâ-yı [3a] mezbûr mahâllinde ba‘de’t-tahrîr ma‘an ba‘s olunan Abdurrahman ve Hızır ile meclis-i şer‘a gelip ve mer‘î üzere inhâ ve takrîr etmeğin mâ-vaka‘a gıbbe’t-taleb ketb olundu. Tahrîren fi’l-yevmi’r-râbi‘ min-şehri Recebi’l-ferd li-sene isneyn ve seb‘în ve elf. Şuhûdü’l-hâl: es-Seyyid Abdülkerim Efendi b. es-Seyyid Süleyman el-imâm, Hasan Efendi b. Burhan el-müezzin, Şaban Beşe b. Mahmud, İvaz Beşe b. Abdullah, Ali Beşe b. Hüseyin, Abdi Çelebi b. Mustafa İbrahim Beşe b. Mehmed, Hasan Çelebi b. Mustafa, Ali Bey b. Mehmed el-yesârî Mahmud Çelebi b. Mustafa, Hasan Bey b. Seydi, A‘rec Mehmed b. Ahmed