İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 116 Hüküm no: 28 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eğin’e bağlı Şirze köyünde bulunan bağın Asvader v. Eşe tarafından Asvader v. Sergiz’e satılması Vilâyet-i Anadolu’da Eğin kazâsına tâbi‘ Şirze nâm karye sükkânından Asvader v. Hreşe nâm Ermeni meclis-i şer‘-i hatîrde işbu hâmilü’s-sifr Asvader v. Sergiz nâm zimmî muvâcehesinde ikrâr ve takrîr-i kelâm edip karye-i mezbûrede vâki‘ bir tarafdan ( ) ve bir tarafdan Mehmed Çelebi b. Hüseyin ve iki tarafdan Nanig v. Şehder tarla ve bağına müntehî dört ırgādlık bir kıt‘a mülk bağımı bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mezbûr Asvader’e yüz yirmi riyâlî guruşa bâtten bey‘ ol dahi iştirâ eyledikden sonra semeni olan meblağ-ı mezbûru tamamen mezbûrun yedinden alıp kabz edip bağ-ı mezbûru mahâllinde kabz ve tasarrufa merkūm Asvader’i taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-Recebi’l-ferd li-sene isneyn ve seb‘în ve elf. Şuhûdü’l-hâl: el-Hâc Ahmed b. Mahmud, Ali b. Muharrem, Veli b. Mahmud, Mustafa b. Mehmed, Hasan b. Mustafa.