İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 117 Hüküm no: 29 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şero v. Yorgi alacağını Receb b. Abdullah’a kefil olan Sefer Usta b. Ahmed’den aldığı Mahmiye-i İstanbul’da Yedikule hâricinde sâkin Şero v. Yorgi nâm zimmî mahfil-i kazâda işbu râfi‘u’l-kitâb Sefer Usta b. Ahmed mahzarında ikrâr ve takrîr-i kelâm edip târih-i kitâbdan üç sene mukaddem gāib ani’l-meclis Receb b. Abdullah nâm kimesne zimmetinde beynimizde vakıyyesi ma‘lûm müşteri ve makbûz lahana semeninden iki bin altı yüz akçe hakkım olup meblağ-ı mezbûru mezbûr Sefer Usta tarafından emr ve kabûlü hâviye kefâlet-i sahîha-i şer‘iye ile kefîl olmuş idi. Mezbûrdan kefâleti hasebiyle meblağ-ı mezbûru taleb etdiğimde deyn-i mezbûru kefâlet-i mezbûreyi mezkûr Sefer Usta bi-tav‘ihî ikrâr ve i‘tirâf etmeğin meblağ-ı mezbûrun bi-hükmi’l-kefâle edâsına hükmolmuş idi. Hâlâ meblağ-ı mezbûr iki bin altı yüz akçeyi mezbûr Sefer Usta yedinden bi’t-tamam ve’l-kemâl ahz u kabz edip kefâlet-i mezbûreden zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâmin min-Recebi’l-ferd li-sene [10]72. Şuhûdü’l-hâl: Mustafa Beşe b. Muslu el-mübâşir, Şükrullah b. Mustafa, Hüseyin b. Ebîbekir, Abdi Çelebi b. Hüseyin, Rasûl b. Rıdvan.