İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 120 Hüküm no: 35 Orijinal metin no: [3b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdullah’ın muhâlaa yoluyla kocası ı Ali b. Bereket’ten boşandığı Mahmiye-i İstanbul’da Akseki mahallesinde sâkine Emine bt. Abdullah nâm hatun tarafından hul‘-ı âti’z-zikri ikrâra vekîl olup mezbûrenin zâtını ma‘rifet-i şer‘iye ile ârifân olan Mustafa Bey b. Abdu[llah] ve Veli b. Şükrullah şehâdetleri [ile] şer‘an vekâleti sâbite olan Ahmed Çelebi b. Kemâl nâm kimesne meclis-i şer‘-i hatîr-i lâzımü’t-tevkīrde müvekkile-i mezbûrenin zevci işbu bâ‘isü’l-kitâb el-Hâc Ali b. Bereket mahzarında bi’l-vekâle ikrâr ve takrîr-i kelâm edip müvekkilem merkūme Emine Hatun zevci mezbûr el-Hâc Ali zimmetinde mütekarrir ve ma‘kūdün-aleyh olan sekiz yüz akçe mehr-i müecceli ve nafaka-i iddet-i ma‘lûmesi üzerlerine ve me’ûnet-i süknâsı dahi kendi üzerine olmak üzere merkūm el-Hâc Ali ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledikden sonra her biri zevciyete müte‘allika husûslarından âharın zimmetini ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti şehri Recebi’l-ferd li-sene isneteyn ve seb‘în ve elf. Şuhûdu’l-hâl: el-Hâc Süleyman b. el-Hâc Said, Veli b. Mahmud, el-Hâc Mehmed b. el-Hâc Mehmed, Yusuf Efendi el-imâm, Mehmed Çelebi b. ( ) el-müezzin, Mehmed b. Ahmed, Abdi Çelebi b. Hüseyin.