İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 121 Hüküm no: 36 Orijinal metin no: [3b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ahmed’in Hasan Odabaşı b. Muharrem’in eşyalarını çaldığını ikrar ettiği Dergâh-ı âlî yeniçeri odalarından yirmi beşinci ağa bölüğünde hâlâ odabaşı olan râfi‘u’l-kitâb Hasan Odabaşı b. Muharrem mahfil-i kazâda mahmiye-i İstanbul’da Ayasofya-i kebîr kurbünde sâkin Mehmed b. Ahmed nâm kimesne mahzarında üzerine da‘vâ ve takrîr-i kelâm edip târih-i kitâbdan altı gün mukaddem sâkin olduğum odadan mezbûr Mehmed işbu yedinde mevcûd olan bir sîm bıçağım ve bir sîm Çerkes rahtım ve bir sîm resmeyi hufyeten ahz eylemişdir suâl olunup takrîri tahrîr ve zikrolunan eşyâyı bana def‘ ü teslîm olunması murâdımdır dedikde gıbbe’s-suâl mezbûr Mehmed fi’l-vâki‘ târih-i mezbûrda müdde‘î-i merkūm Hasan Odabaşı’nın sâkin olduğu odasından hâlâ yedimde olan işbu sîm bıçak ve sîm raht ve sîm reşmeyi hufyeten ahz eyledim deyü tav‘an ikrâr etmeğin mâ hüve’l-vâki‘ bi’t-taleb ketb olundu. Fi’l-yevmi’l-âşir min-Recebi’l-ferd li-sene [10]72. Şuhûdu’l-hâl: Ahmed Ağa b. Mahmud, Mehmed Beşe b. Hızır, Hasan [b.] Abdullah, Ali Beşe b. Mehmed.