İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 121 Hüküm no: 37 Orijinal metin no: [3b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani ve Hâtime’nin menzilini vekilleri Saime marifetiyle Süleyman Beşe b. Abdullah’a sattığı Mahmiye-i İstanbul’da Tahtaminâre mahallesinde sâkine Saime bt. Abdullah nâm hatun meclis-i şer‘de bâ‘isü’l-vesîka Süleyman Beşe b. Abdullah nâm kimesne mahzarında ikrâr ve takrîr-i kelâm edip mahalle-i mezbûrede vâki‘ etrâf-ı erba‘ası Ümmühani ve Hâtime ve el-Hâc Mehmed nâm kimesneler menzilleri ve tarîk-i âmma müntehî iki fevkānî ve iki tahtânî odaları hâvî ve eşcâr-ı müsmire ve gayr-ı müsmire cüneyneyi müştemil mülk menzili mezbûretân Ümmühani ve Hâtime taraflarından nısf-ı şâyi‘ini tarafeynden îcâb ve kabûlü hâvî bey‘-ı bâtt-ı sahîh-i şer‘î ile mezbûr Süleyman Beşe’ye yirmi bin fıddî akçeye bey‘ ve teslîm ol dahi minvâl-i muharrer üzere iştirâ ve kabûl ve tesellüm eyledikden sonra semeni olan meblağ-ı mezkûr yirmi bin akçeden mezbûr Süleyman Beşe’nin zimmetini ibrâ ve ıskāt eyledim ba‘de’l-yevm menzil-i mezbûrun nısf-ı şâyi‘i mezbûrun mülküdür keyfe mâ yeşâ mutasarrıf olsun dedikde gıbbe’t-tasdîk mâ-vaka‘a bi’t-taleb ketb olundu. Fi’t-tâsi‘ min-Recebi’l-ferd li-sene isneteyn ve seb‘în ve elf. Şuhûdu’l-hâl: Mehmed Efendi b. Ali el-imâm, el-Hâc Ahmed b. Mahmud, Abdi Çelebi b. Hüseyin, İbrahim Çelebi b. Abdullah, Mehmed Beşe b. Hüseyin, Halil Beşe b. Rasûl, Baba Rasûl b. Rıdvan, Veli b. Mahmud.