İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 122 Hüküm no: 38 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zülfikâr Ağa b. Abdülmennan’ın Beyceğiz mahallesindeki menzilini oğlu Mehmed Emin Çelebi’ye hibe ettiği Hîbe-i menzil. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Ahmed Efendi irsâl olunup ol dahi mahmiye-i İstanbul’da Beyceğiz mahallesinde vâki‘ zikri âtî menzile varıp zeyl-i vesîkada isimleri mastûr Müslimîn huzûrunda akd-i meclis-i şer‘ eyledikde menzil-i câ’i’z-zikrin mâliki olup Vilâyet-i Rumeli’nde Tırnova kasabasında sâkin merhûm Koca Yusuf Paşa kethudâsı olan Dergâh-ı âlî müteferrikalarından umdetü’l-emâsil ve’l-a‘yân makbûlü’s-sudûr ve’l-erkân el-Hâc Zülfikar Ağa b. Abdülmennan tarafından husûs-ı âtîye vekîl olup kasaba-i mezbûre sükkânından Mehmed Bey b. Durak ve Yusuf b. Lütfullah ve el-Hâc Musa b. Abdullah ve el-Hâc Mustafa b. Mahmud şehâdetleri ile şer‘an vekâleti sâbite olan İvaz Bey b. Kurd Bey meclis-i ma‘kūd-ı mezbûrda bi’l-vekâle ikrâr ve i‘tirâf edip müvekkilim mûmâ-ileyh el-Hâc Zülfikar Ağa zikrolunan Beyceğiz mahallesinde vâki‘ bir tarafı âhar menzilime ve bir tarafı tarîk-i hâssa ve bir tarafı Kâtib Ali Çelebi menziline ve bir tarafı tarîk-i âmma müntehî üç bâb fevkānî odaları ve tahta ahırı ve su kuyusunu ve hadîkayı ve etrâf-ı erba‘ası taş duvarı müştemil hâriciye ta‘bîr olunur mülk menzilimi mukaddemâ sulbî sagīr oğlum Mehmed Emin Çelebi’ye hîbe-i sahîha-i şer‘iye ile hîbe ve velâyeten ittihâb ve kabûl ve kabz eyledim ba‘de’l-yevm zikrolunan hâriciye ta‘bîr olunur menzil-i merkūm Mehmed Emin Çelebi’nin mülk-i mevhûbu olmuşdur dedikde vâki‘ hâli mevlânâ-yı mezbûr mahâllinde tahrîr ba‘dehû ma‘an ba‘s olunan Ahmed b. Mustafa ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’s-sâbi‘ min-Recebi’l-ferd li-sene isneteyn ve seb‘în ve elf. Şuhûdu’l-hâl: Umdetü’l-meşâyih Hamza Efendi, Fahrü’l-eimme Süleyman Efendi b. Hamza, Halil Efendi el-hatîb, Ali Bey b. Receb, Mehmed Çelebi b. Hasan, Receb b. Abdünnebi, Siyavuş b. Abdullah, el-Hâc Hasan b. Abdullah, İsmail Halîfe b. Yusuf, Sefer Efendi b. Ahmed, Hasan Efendi b. ( ). Yazıcı Ali Çelebi b. ( ), Bosnevî Mustafa Ağa b. ( ), Halil b. ( ), el-Hâc Mustafa, Receb b. Abdullah, Ahmed b. Mustafa.