İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 122 Hüküm no: 39 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zülfikâr Ağa b. Abdülmennan’ın Beyceğiz mahallesindeki menzilini karısı Muammer bt. Abdullah’ı satıp bedelini borcuna takas ettiği Takāss-ı menzil. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Ahmed Efendi irsâl olunup ol dahi mahmiye-i İstanbul’da Beyceğiz mahallesinde zikri âtî menzile varıp zeyl-i vesîkada isimleri mastûr olan Müslimîn huzûrunda akd-i meclis-i şer‘ eyledikde menzil-i câ’i’z-zikrin mâliki olup Vilâyet-i Rumeli’nde Tırnova kasabasında sâkin merhûm Koca Yusuf Paşa kethudâsı Dergâh-ı âlî müteferrikalarından umdetü’l-emâsil ve’l-a‘yân makbûlü’s-sudûr ve’l-erkân Zülfikar Ağa b. Abdülmennan tarafından husûs-ı âti’z-zikre vekîl olup kasaba-i mesfûre sükkânından Mehmed Bey b. Durak ve Yusuf b. Lütfullah ve el-Hâc Musa b. Abdullah ve el-Hâc Mustafa b. Mahmud şehâdetleri ile şer‘an vekâleti sâbite olan Muslı Bey b. Abdullah meclis-i ma‘kūd-ı mezbûrda müvekkil-i mûmâ-ileyhin zevce-i menkûhası bâ‘isetü’l-kitâb Muammer Hatun bt. Abdullah tarafından zikrî câ’î ikrârı tasdîka sâbitü’l-vekâle vekîl olan İvaz Bey b. Kurd Bey mahzarında bi’l-vekâle ikrâr ve i‘tirâf edip müvekkilim mûmâ-ileyhin silk-i mülkünde münselik olup mahalle-i mezbûrede vâki‘ bir tarafı Kör Halil mülküne ve bir tarafı el-Hâc Mustafa menziline ve bir tarafı oğlu Mehmed Emin Çelebi’ye hîbe eylediği menzile ve iki tarafı tarîk-i hâssa müntehî olup tarîk-i hâs tarafında vâki‘ iki bâb oda ve iki sofa ve dehliz ve matbah ve kileri mezbûr el-Hâc Mustafa tarafında vâki‘ iki bâb oda ve üç sofa ve etrâf-ı selâsesi taş duvarı ve hadîkayı müştemil dâhiliye ta‘bîr olunur menzili müvekkilim mezbûr bey‘-ı bâtt-ı sahîh-i şer‘î ile merkūme Muammer Hatun’a yüz otuz bin fıddî râyic fi’l-vakt akçeye bey‘ ve teslîm ol dahi iştirâ ve kabûl ve kabz ve tesellüm eyledikden sonra semeni olan meblağ-ı mezbûr yüz otuz bin akçeyi müvekkilim mezbûrun müvekkile-i merkūme yedinden müşterâ ve makbûz menzil semeninden deyni olan yüz otuz bin fıddî râyic fi’l-vakt akçeye takās edip ol dahi mukāssa ve kabûl eyledi ba‘de’l-yevm zikrolunan dâhiliye ta‘bîr olunur menzil merkūme Muammer’in mülk-i müşterâsı olmuşdur keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Ahmed b. Mustafa ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’s-sâmin min-Recebi’l-ferd li-sene isneteyn ve seb‘în ve elf. Şuhûdu’l-hâl: es-Sâbıkūn.