İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 123 Hüküm no: 40 Orijinal metin no: [4a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Abdurrahman’ın muhâlaa yoluyla kocası Ali Bey b. Satılmış’tan boşandığı Husûs-ı âti’l-beyânın mahâllinde tahrîri iltimâs için savb-ı şer‘den Mevlânâ Ahmed Efendi b. Hanefi irsâl olunup ol dahi mahmiye-i İstanbul’da Sinan Ağa mahallesinde Sâliha bt. Abdurrahman Ağa nâm hatun[un] sâkine olduğu menziline varıp zeyl-i rakīmde muharrerü’l-esâmî olan Müslimîn huzûrunda akd-i meclis-i şer‘ eyledikde mezbûre Sâliha Hatun’un zâtını ma‘rifet-i şer‘iye ile ârifân mahalle-i mezbûre sükkânından Ahmed Efendi b. Mehmed ve Ahmed b. Mustafa nâm kimesneler ta‘rîfleri ile mu‘arrefe oldukdan sonra meclis-i ma‘kūd-ı mezbûrda zevci işbu bâ‘isü’l-kitâb Ali Bey b. Satılmış mahzarında bi-tav‘ihâ ikrâr ve takrîr-i kelâm edip zevcim mezbûr Ali Bey zimmetinde mütekarrir ve ma‘kūdün-aleyh olan on bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledikden sonra zevciyete ve gayra müte‘allika âmme-i de‘âvîden her birimiz âharın zimmetini ibrâ-i âm ile ibrâ ve ıskāt eyledik dedikde gıbbe’t-tasdîk vâki‘ hâli mevlânâ-yı mezbûr mahâllinde tahrîr ve ma‘an irsâl olunan el-Hâc Veli b. Ali ile meclis-i şer‘a gelip alâ-vukū‘ihî inhâ ve takrîr [etmeğin] mâ-vaka‘a bi’t-taleb ketb olundu. Fi’l-âşir min-Recebi’l-ferd li-sene isneyn ve seb‘în ve elf. Şuhûdu’l-hâl: eş-Şeyh Müstakīm Efendi b. Musa, Mehmed Efendi b. Hasan el-imâm, Ahmed Ağa b. Mehmed el-mübâşir, el-Hâc Veli b. Ali, Ahmed Çelebi b. Mehmed, Ali Çelebi b. Hasan, Mehmed b. Hüseyin.