İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 124 Hüküm no: 41 Orijinal metin no: [4a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime bt. Mustafa’nın aldığı borç karşılığında evini Tercüman Yunus Vakfı’na rehin verip bir yıllığına kiraladığı Hüccet-i istiğlâl. Mahmiye-i İstanbul’da Mimar Sinan mahallesinde sâkine Rahime Hatun bt. Mustafa tarafından husûs-ı câ’i’z-zikre vekîl olup mezbûrenin zâtını ma‘rifet-i şer‘iye ile ârifân Ali Çelebi b. Ömer ve Abdülkadir Çelebi b. Mehmed şehâdetleri ile şer‘an vekâleti sâbite olan babası mezbûr Mustafa b. İsmail meclis-i şer‘de mahmiye-i mezbûrede Tercüman Yunus Vakfı’na bi’l-fi‘il mütevellî olan işbu râfi‘u’l-kitâb Mustafa Çelebi b. Mahmud mahzarında bi’l-vekâle ikrâr ve takrîr-i kelâm edip müvekkilem mezbûre Rahime medîne-i Ebî Eyyüb-i Ensârî’de Takyecibaşı mahallesinde vâki‘ bir tarafı Âişe Hatun bt. Mehmed mülküne ve bir tarafdan Ümmühani Hatun bt. Abdullah mülküne ve bir tarafdan Âişe Hatun bt. Yunus mülküne ve bir tarafdan tarîk-i âm ile mahdûd mülk-i mevrûsu olan menzilini bi-cümleti’t-tevâbi‘ ve’l-levâhık mütevellî-i mezbûra on dokuz bin üç yüz akçeye istiğlâl-i şer‘î tarîki üzere bey‘ ve teslîm ol dahi minvâl-i muharrer üzere mal-ı vakf-ı mezbûr ile iştirâ ve tesellüm edip semeni olan meblağ-ı mezbûru tamamen mütevellî-i mezbûr yedinden alıp kabz eyledikden sonra yine menzil-i mezbûru ba‘de’t-tahliyeti’ş-şer‘iye ve’t-takābuzi’l-mer‘î târih-i mezbûrdan bir sene tamamına dek iki bin dokuz yüz yirmi akçe ücret ile mütevellî-i mezbûrdan müvekkilem istîcâr ve tesellüm ve kabûl ve mütevellî-i mezbûr dahi minvâl-i muharrer üzere îcâr ve teslîm eyledi dedikde gıbbe’t-tasdîkı’ş-şer‘î menzil-i mezbûrun derkine ve ücret-i merkūmesine vekîl-i mezbûr Mustafa b. İsmail emr ve kabûlü hâviye kefâletle ben kefîl oldum dedikde mâ hüve’l-vâki‘ bi’t-taleb ketb olundu. Fi’s-sâbi‘ min-Recebi’l-ferd li-sene isneyn ve seb‘în ve elf. Şuhûdu’l-hâl: Ahmed Efendi b. Abdülmümin-el-imâm, es-Seyyid Mehmed b. es-Seyyid İbrahim, Ali b. Mustafa, Murad Halîfe b. Ahmed.