İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 125 Hüküm no: 42 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata Voyvodası Pîrî Çavuş b. Abdullah’ın Sultan Ahmed Han Vakfı’na 471.776 akçe borcu olduğunu ikrar ettiği Merhûm ve mağfûrun-leh Sultan Ahmed Han aleyhi’r-rahmetü ve’l-gufrân hazretlerinin evkāfı mütevellîsi umdetü’l-a‘yân Hüseyin Bey tarafından vakf-ı mezbûra müte‘allik cemî‘ umûruna vekîli olup bi-mâ [hüve] nehcü’s-sübût şer‘an vekâleti sâbite olan vakf-ı mezbûrun imâretinde vekîl-i harc olan fahrü’l-akrân Mustafa Ağa b. Mahmud dîvân-ı âlî dâme mahfûfen li’l-e‘âlîde kāimmakām-ı sadrazamîde akd olunan meclis-i şer‘-i hatîrde bin yetmiş bir senesinde vakf-ı mezbûr tevâbi‘inden mahrûse-i Galata’da voyvoda olan Pîrî Çavuş [b.] Abdullah mahzarında üzerine takrîr-i da‘vâ edip mahrûse-i mezbûrenin sene-i mezbûrede vâki‘ olan mahsûlât ve sâir avâidini ve her sene olageldiği üzere kırk iki yük otuz bin akçeye der-uhde olunup ol dahi ba‘de’l-kabûl meblağ-ı mezbûrun iki yük elli bin akçesini Haremeyn-i Şerîfeyn için bundan akdem Dârü’s-sa‘âde ağası hazretlerine def‘ ü teslîm ve câbî‘-i vakf-ı mezbûra â’id olan meblağ-ı bâkī otuz dokuz yük seksen bin akçeden dahi mezbûr Pîrî Çavuş yedinden bi’d-defa‘ât ahz u kabz olunup ba‘de küllî hesâb dört yük yetmiş bir bin yedi yüz yetmiş altı akçesi zimmetinde bâkī kalmış idi hâlâ vekâletim hasebiyle cânib-i vakf için taleb ederim suâl olunsun dedikde gıbbe’s-suâl mezbûr Pîrî cevâbında fi’l-vâki‘ mezkûr voyvodalık mâlından ba‘de küllî hesâb zimmetimde meblağ-ı merkūm dört yük yetmiş bir bin yedi yüz yetmiş altı akçe lâzımü’l-edâ deynimdir deyü ikrâr ve i‘tirâf edecek mûcebince meblağ-ı mersûm dört yük yetmiş bir bin yedi yüz yetmiş altı akçeyi vekîl-i mezbûr Mustafa Ağa’ya def‘ [ü] teslîme tenbîh birle mâ-vaka‘a bi’t-taleb kaydolundu. Fi’l-yevmi’l-âşir min-Recebi’l-ferd sene [10]72. Şuhûdu’l-hâl: el-Hâc Ömer el-cündî ve Mehmed Ağa Çavuşbaşı, Hayrullah Ağa, Ali Çelebi, el-Hâc Yusuf b. Abdullah, Mehmed Çavuş, [b.] Mehmed Ağa, el-Hâc Mehmed [b.] Hâmid.