İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 125 Hüküm no: 43 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. İbrahim’in merhum Mehmed Beşe’nin kızları Rahime ve Sâliha’ya 66 guruş 66 akçe borcu olduğunu ikrar ettiği Mahmiye-i İstanbul hısnı ebvâbından Yenikapı hâricinde sâkine Mustafa Çelebi b. İbrahim nâm kimesne meclis-i şer‘de bundan akdem vefât eden Mehmed Beşe b. ( ) nâm kimesnenin sulbiye kebîre kızı Rahime ile sagīre kızı Sâliha’nın vâlidesi olup tesviye-i umûruna kıbel-i şer‘den mansûbe vasîsi Emine Hatun mahzarında tav‘an ikrâr ve takrîr-i kelâm edip mezbûretân Rahime ve Sâliha’ya karz-ı şer‘îden zimmetimde vâcibü’l-edâ ve lâzımü’l-kazâ altmış altı riyâlî guruş ile altmış altı akçe deynim olup meblağ-ı mezbûru yüz seksen gün tamamına dek edâya ta‘ahhüd eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’s-sâbi‘ min-Recebi’l-ferd li-sene isneyn ve seb‘în ve elf. Şuhûdu’l-hâl: Hüseyin Efendi el-Burûsî, el-Hâc Mustafa Efendi el-kâtib, Abdülhâdî Efendi el-Burûsî, Keşfî Mustafa Efendi el-kâtib, Abdülkerim Beşe ser-oda, Abdi Çelebi b. Hüseyin el-muhzır, Şükrullah b. Mustafa el-muhzır.