Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 188 Hüküm no: 175 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beytülmâl Emini Ali Ağa’nın vefat eden Gürcü Mehmed’e ait olduğu iddiasıyla el koyduğu Çerkes cariye Ayşe’nin yarı hissesinin Süleyman b. Ali’ye ait olduğu Efendi hazretleri imzâsıyladır. Dergâh-ı âlî yeniçerilerinden Dördüncü Cemâ‘ate mahsûs oda ahâlîsinden olup mahmiye-i İstanbul’da Esir Hanı demekle ma‘rûf handa sâkin bâ‘isü’l-kitâb Süleyman b. Ali dîvân-ı kāimmakām-ı hazret-i sadrazamîde akd olunan meclis-i şer‘-i âlîde mahmiye-i mezbûrede yeniçeri beytülmâli emîn[i] olan Ali Ağa b. İsmail muvâcehesinde üzerine da‘vâ ve takrîr-i kelâm edip mezbûrun yedinde olan işbu orta boylu, açık kaşlı elâ gözlü [37a] Abaziyyetü’l-asl Âişe bt. Abdullah nâm câriye mahmiye-i mezbûrede Alaca Hamam kurbünde ( ) mahallesinde sâkin iken bundan akdem vefât eden Gürcü Mehmed b. Abdullah ile ale’l-iştirâki’s-seviyy mülkümüz olup müteveffâ-yı mezbûr Mehmed’in vâris-i ma‘rûfu olmamağla mevsûfe-i mezbûreyi müstakıllen mezbûr Gürcü Mehmed’in mülkü olmak üzere mezbûr Ali Ağa beytülmâl için kabz etmekle benim nısf hisseme bi-gayr-ı hakkın vaz‘-ı yed eder. Suâl olunup hissemden kasr-ı yedine ve bana teslîme mezbûr Ali Ağa’ya tenbîh olunması matlûbumdur dedikde gıbbe’s-suâl mezbûr Ali Ağa cevâbında mevsûfe-i mezbûreyi müstakıllen müteveffâ-yı mezbûrun mülkü olmağla beytülmâl için kabz etmişimdir deyü nısfı müdde‘î-i mezbûrun mülkü olduğu ma‘lûmum değildir deyü inkâr edicek müdde‘î-i mezbûrdan da‘vâsına mutâbıka beyyine taleb olundukda mahmiye-i mezbûrede Firuz Ağa mahallesinde sâkin Süleyman Beşe b. Abdullah ve medîne-i Galata muzâfâtından kasaba-i Tophane’de Mehmed Ağa mahallesinde sâkin olup Vâlide Çarşısı’nda attâr olan Mustafa Beşe b. Hasan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mevsûfe-i mezbûre müteveffâ-yı mezbûr ile müdde‘î-i mezbûrun ale’l-iştirâki’s-seviye mülk ve hakları olup mevsûfe-i mezbûrenin nısfı müdde‘î-i mezbûra teslîm emîn-i mezbûr Ali Ağa’nın üzerine lâzımdır, biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri hayyiz-i kabûlde vâkı‘a [mutâbık] olup müdde‘î-i mezbûr tahlîf-i şer‘î ile tahlîf olundukdan sonra mevsûfe-i mezbûrenin nısfını müdde‘î-i mezbûre teslîme emîn-i mezbûr Ali Ağa’ya tenbîh olunmağın mâ-hüve’l-vâki‘ bi’t-taleb ketb olundu. Fi’l-yevmi’l-hâdî aşer min-Recebi’l-ferd li-sene ihdâ ve semânîn ve elf. Şuhûdü’l-hâl: Derviş Ağa b. ( ), Hüseyin Beşe çukadâr, Mehmed Ağa ser-muhzırân, umdetü’n-nüvvâb Hasan Efendi, ve gayruhum.