İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 126 Hüküm no: 45 Orijinal metin no: [4b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime bt. Himmet’in Hasan Beşe b. Mustafa ile aralarında olan anlaşmazlıkta sulh olduğu Mahmiye-i Karagümrük kurbünde sâkine Rahime bt. Himmet nâm hatun meclis-i şer‘-i hatîrde bundan akdem kasaba-i Mihaliç’de yeniçeri serdârı olan hâfızü’l-vesîka Hasan Beşe b. Mustafa mahzarında tav‘an ikrâr ve takrîr-i kelâm edip medîne-i Üsküdar’da sâkin Kara Mehmed nâm esirci kebîre kızım Hadice’yi ayardıp câriyemdir deyü kasaba-i merkūmede bey‘ etmek üzere iken tutulup hâkim mezbûru serdâr-ı merkūmun habsine verdikden sonra mezbûr merkūm Kara Mehmed’i habsinden kaçırdıkda buldur deyü merkūmdan da‘vâ eylediğimde mezbûr Hasan Beşe kaçırdığını inkâr etmekle beynimizde münâza‘ât vâkı‘a olmuş idi tavassut-ı muslihîn ile da‘vâ-yı merkūmdan benimle bin beş yüz akçe üzerine sulh olup ben dahi sulh-ı mezbûru kabûl ve bedel-i sulh olan bin beş yüz akçeyi yedinden kabz edip husûs-ı mezbûra müte‘allika cemî‘ de‘âvâ ve muhâsamâtdan zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim min-ba‘d benden yâ vekîlimden da‘vâ sudûr ederse lede’l-hükkâmi’l-kirâm mesmû‘a olunmasın dedikde gıbbe’t-tasdîkı’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min-Recebi’l-ferd li-sene isneyn ve seb‘în ve elf. Şuhûdu’l-hâl: es-Sâbıkūn.