İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 128 Hüküm no: 48 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canfeda bt. Abdullah ve kızı Emine’nin alacak hususunda Kapıcı Ömer Bey b. Piyale ile yedi bin akçe üzerine sulh oldukları Mahmiye-i İstanbul’da Kadıçeşmesi kurbünde Sinan mahallesinde Yahya Efendi odalarında sâkin iken bundan akdem vefât eden el-Hâc Mehmed’in verâseti zevce-i metrûkesi Canfeda bt. Abdullah’a ve kızı Emine Hatun’a münhasıra olduğu şer‘an zâhir oldukdan sonra mezbûretân Canfeda ve Emine taraflarından husûs-ı câ’i’z-zikre vekîl olup mezbûretânın zâtlarını ma‘rifet-i şer‘iye ile ârifân olan Hasan b. İbrahim ve Osman Bey b. Piyale şehâdetleri ile şer‘an vekâleti sâbite olan mezbûre Emine’nin zevci Abdülbaki Bey b. Hasan nâm cündî meclis-i şer‘-i hatîr-i lâzımü’t-tevkīrde işbu râfi‘u’l-kitâb Kapıcı Ömer Bey b. Piyale mahzarında bi’l-vekâle ikrâr ve takrîr-i kelâm edip müvekkiletân-ı mezbûretânın mûrisleri müteveffâ-yı mezbûr el-Hâc Mehmed hâl-i sıhhatinde Uzunçarşı’da vâki‘ ma‘lûmü’l-hudûd bıçakçı dükkânını mezbûr Ömer Bey’e kırk bin akçeye bey‘ ve teslîm ol dahi minvâl-i muharrer üzere iştirâ ve tesellüm ve kabûl eyledikden sonra semeninden yirmi dokuz bin beş yüz akçesini hayatında bi’d-defa‘ât yedinden alıp kabz edip bâkī kalan on bin beş yüz akçesini ba‘de vefâtihî müvekkilelerime ırsen intikāl etmeğin meblağ-ı bâkī-i mezbûru merkūm Ömer Bey’den bundan akdem vekâleten taleb etmekle beynimizde münâza‘ât-ı kesîre câriye olmuş idi el-hâletü hâzihî beynimize muslihûn-ı Müslimûn vesâtet ile meblağ-ı mezbûra merkūm Ömer Bey benimle yedi bin akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr yedi bin akçeyi tamamen mezbûr Ömer Bey yedinden müvekkilelerim için alıp kabz edip mâ‘adâsı olan üç bin beş yüz akçesinden mezbûr Ömer Bey’in zimmetini bi’l-vekâle ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ min-Recebi’l-ferd sene [10]72. Şuhûdu’l-hâl: Mehmed Çelebi b. Receb, Şükrullah b. Mustafa, Mustafa Çelebi [b.] Mehmed, Abdüllatif Çelebi b. ( ).