İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 135 Hüküm no: 58 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Benha v. Yako’nun ham ibrişim bedelinden merhum Abdullah b. Musa’ya olan yüz yirmi guruş borcunu varislerine ödemesine karar verildiği Bi’l-fi‘il kāimmakām-ı vezâret-i uzmâ ve mesned-nişîn-i vekâlet-i kübrâda akd olunan meclis-i şer‘de mahmiye-i İstanbul’da Kebeciler Hanı’nda sâkin iken vefât eden Abdullah b. Musa nâm kimesnenin verâseti zevce-i metrûkesi Fâtıma bt. Mehmed’e ve sulbî sagīr oğulları Ali ve İsmail’e ve sulbiye sagīre kızı Âişe’ye münhasıra ve tashîh-i meseleleri kırk sehimden olup sihâm-ı merkūmenin beşer sehmi mezbûre Fâtıma’ya ve on dörder sehmi mezbûrân Ali ve İsmail’e ve yedi sehmi mezbûre Âişe’ye isâbet eylediği şer‘an zâhir oldukdan sonra sıgār-ı mezbûrûnun kıbel-i şer‘den mansûb vasîleri olan li-ebeveyn ammileri Hidâyet, Benha v. Yako nâm Yahûdî mahzarında üzerine da‘vâ ve takrîr-i kelâm edip târih-i kitâbdan bir sene mukaddem mezbûr Yahûdî müteveffâ-yı merkūmdan hâl-i sıhhatinde her destesi yirmi riyâlî guruşa olmak üzere yüz yirmi guruşa altı deste ham ibrişim iştirâ ve kabz edip semenleri olan yüz yirmi riyâlî guruşu kable’l-edâ mezbûr fevt olup ırsen verese-i mezbûrûna intikāl etmekle mezbûrânın yirmi sekiz sehm hisseleri ile merkūme Âişe’nin yedi sehm hissesine isâbet eden yüz beş riyâlî guruş mezbûr Yahûdiden taleb ederim suâl olunsun dedikde gıbbe’s-suâl mezbûr Yahûdî de sene-i merkūmeden mukaddem hâl-i sıhhatinde müteveffâ-yı mezbûrdan yüz yirmi riyâlî guruşa altı deste hâm ibrişim iştirâ ve kabz eylediğini bi’l-külliye inkâr eyledikde mezbûr Hidâyet’den müdde‘âsı için beyyine taleb olundukda udûl-i Müslimînden han-ı mezbûr sükkânından Sofuoğlu el-Hâc Mehmed ile Musa b. Mustafa nâm kimesneler li-ecli’ş-şehâde meclis-i şer‘a hâzırân olup gıbbe’l-istişhâdi’ş-şer‘î fi’l-hakīka sene-i merkūmeden mukaddem mezbûr Yahûdî müteveffâ-yı mezbûrdan hâl-i sıhhatinde her destesi yirmi guruşa olmak üzere yüz yirmi guruşa huzûrumuzda altı desti hâm ibrişim iştirâ ve kabz edip semenleri zimmetindedir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın sıgār-ı mezbûrûnun hisseleri mukābelesinde ta‘yîn olunan yüz beş riyâlî guruş vasîyy-i mezbûr Hidâyet’e teslîme mezbûr Yahûdiye tenbîh birle mâ-vaka‘a bi’t-taleb ketb olundu. Fi’l-yevmi’s-sânî aşer min-Recebi’l-ferd sene [10]72. Şuhûdu’l-hâl: İsmail Çelebi b. Ahmed, Ali Beşe b. el-Hâc Mehmed, Mehmed Çelebi b. el-Hâc Mustafa, Mehmed Ağa b. Mahmud muhzırbaşı, Bayram Çelebi b. Mustafa.