İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 136 Hüküm no: 59 Orijinal metin no: [6a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Bey b. Abdullah’ın alacak hususunda Mehmed Beşe b. Mustafa ile sulh olduğu Mahmiye-i İstanbul’da Pirinçci Mescidi mahallesi ahâlîsinden İbrahim Bey b. Abdullah nâm kimesne meclis-i şer‘de Mehmed Beşe b. Mustafa mahzarında bi’t-tav‘i’s-sâf ikrâr ve takrîr-i kelâm edip târih-i kitâbdan dört sene mukaddem mezbûrdan karz aldığım yirmi bin akçe mukābelesinde benden irtihân ve kabz eylediği elli miskāl üç tek altın bilezik, on miskāl altın düğme ve dört bin kıymet-i şer‘iyeli bir sırmalı keçe ve tânesi yüz otuz akçe kıymet-i şer‘iyelerinden inek gönünü deyn-i mezbûrun bin dört yüz akçesine kabz eyledikden sonra iznimsiz âhara bey‘ ve tesellümlerini ba‘de’l-kabz kendi mesârifine sarf ile istihlâk edip deynim olan on sekiz bin altı yüz akçemi mezbûra teslîm murâd edip rihân-ı merkūmenin kıymet-i şer‘iyelerini merkūm Mehmed Beşe’den da‘vâ eylediğimde tavassut-ı muslihûn ile mezbûr da‘vâ-yı merkūmeden benimle dört bin akçe üzerine sulh olup ben dahi sulh-ı mezbûru kabûl ve bedel-i sulh olan meblağ-ı mezbûr dört bin akçeyi yedinden kabz edip husûs-ı mezbûra müte‘allika da‘vâdan zimmetini ibrâ ve ıskāt eyledim dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’s-sâmin aşer min-Recebi’l-ferd li-sene isneyn ve seb‘în ve elf. Şuhûdu’l-hâl: Hâlâ Muhzır Ağa fahrü’l-akrân İbrahim Ağa, Bostancılar Odabaşısı Süleyman Ağa, Vekîl-i harc Mehmed Beşe oda-i muhzır ağa, Hüseyin Beşe b. Hasan el-mübâşir, Mustafa Çelebi b. Mehmed, Ahmed Efendi el-kādî, Abdülkadir Efendi el-kâtib.