İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 136 Hüküm no: 60 Orijinal metin no: [6a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem bt. Abdullah’ın Hatice Sultan mahallesindeki menzilini Sâliha bt. Abdullah’a sattığı Mahmiye-i İstanbul’da Hadîce Sultan mahallesinde sâkine Meryem bt. Abdullah nâm hatun tarafından husûs-ı âtîye vekîl olup mezbûrenin zâtını ma‘rifet-i şer‘iye ile ârifân olan es-Seyyid Talha b. es-Seyyid Üveys ve Abdi Çelebi b. Mustafa nâm kimesnler şehâdetleri ile vekâleti sâbite olan Mustafa Çelebi b. Abdullah nâm kimesne meclis-i şer‘de Sâliha bt. Abdullah nâm hatun tarafından husûs-ı câ’îye vekîl olup bi-mâ hüve nehcü’s-sübût vekâleti sâbite olan Mehmed Beşe b. İvaz nâm kimesne mahzarında bi’l-vekâle ikrâr ve takrîr-i kelâm edip müvekkile-i mezbûre Meryem Hatun mahalle-i merkūmede vâki‘ bir tarafı Ahmed Ağa mülküne ve bir tarafı Kara Çavuş bostanına ve bir tarafı Mustafa Beşe mülküne ve bir tarafı tarîk-i hâssa müntehî iki bâb tahtânî odayı ve kenîfi ve zât-ı eşcâr-ı müsmire ve gayr-ı müsmire bahçeyi müştemil mülk menzilini müvekkile-i merkūme Sâliha Hatun’a on altı bin akçeye bey‘ ve teslîm ol dahi vech-i muharrer üzere iştirâ ve tesellüm edip semeni olan on altı bin akçeyi yedinden kabz edip min-ba‘d menzil-i mezbûr merkūme Sâliha Hatun’un mülk-i müşterâsı olup keyfe mâ teşâ ve tahtâr mutasarrıfa olsun dedi dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’s-sâmin aşer min-Recebi’l-ferd li-sene isneyn ve seb‘în ve elf. Şuhûdu’l-hâl: Hüseyin Efendi el-Burûsî, Ahmed Efendi el-müderris el-kâtib, Keşfî Mustafa Efendi el-kâtib, Mehmed Efendi imâm-ı mahalle-i mezbûre, Receb Halîfe b. ( ) el-müezzin, Mehmed Beşe b. Ramazan, Şükrullah b. Mustafa, Abdi b. Hüseyin.