İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 137 Hüküm no: 61 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ali Efendi’nin küçük oğlu Salih’in vasîsi olan İsa’nın azliyle yerine Ümmühani bt. Mahmud’un vasî tayin olunduğu Kasaba-i Yalakâbad’da sâkin iken vefât eden Ali Efendi b. Receb’in verâseti zevce-i metrûkesi Ümmühani bt. Mahmud ve sulbiye sagīr oğlu Salih ile sagīre kızı Âişe’ye münhasıra ve kable’l-kısme mezbûre Âişe dahi fevt olup verâseti vâlidesi merkūme Ümmühani ile eli-ebeveyn karındaşı mezbûr Salih’e münhasıra oldukdan sonra mezbûr Salih’in kıbel-i şer‘den mansûb vasîsi olan İsa kasaba-i merkūme toprağında vâki‘ be-kavl-i hod makbûzu olup bi-tarîkı’l-münâsaha mezbûre Ümmühani ile sagīr-i mezbûra intikāl eden mülk bağ ile dokuz bin iki yüz akçenin dokuz bin iki yüz nakid akçesini müceddeden binâ eylediği mülk menziline sarf ile istihlâk eylediğini bi’t-tav‘i’s-sâf ikrâr etmekle vesâyetden azli lâzım oldukda hâfızü’l-vesîka merkūme Ümmühani Hatun vesâyet-i merkūmeye lâyıka ve kādire olmağın kıbel-i şer‘den sagīr-i mezbûra vasî nasb ü tayin oldukda ol dahi vesâyet-i merkūmeyi kabûl ve hizmet-i lâzımesini edâya ta‘ahhüd etmeğin mâ hüve’l-vâki‘ bi’t-taleb ketb olundu. Fi’l-âşir min-Recebi’l-ferd li-sene isneyn ve seb‘în ve elf. Şuhûdu’l-hâl: Hüseyin Efendi el-Burûsî, Ahmed el-müderris, Keşfî Mustafa Efendi el-kâtib, Abdülkadir Çelebi el-müderris, Kasab Mustafa el-muhzır, Abdi b. Hüseyin, Şükrullah b. Mustafa, Rasûl b. Rıdvan.