İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 138 Hüküm no: 62 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih b. Ali Efendi ile annesi ve vasîsi Ümmühani bt. Mehmed’e ait olup eski vasî İsa’nın zimmetinde kalan bağ ve paralarının sahiplerine iadesi Kasaba-i Yalakâbad’da sâkine iken bundan akdem vefât eden Ali Efendi b. Receb’in verâseti zevce-i metrûkesi Ümmühani bt. Mehmed’e ve sulbî sagīr oğlu Salih ile sagīre kızı Âişe’ye münhasıra ve kable’l-kısme mezbûre Âişe dahi fevt olup verâseti vâlidesi mezbûre Ümmühani’ye ve li-ebeveyn karındaşı mezbûr Salih’e münhasıra ve tashîh-i meseleleri bi-tarîkı’l-münâsaha yetmiş iki sehm i‘tibâr olunup sihâm-ı merkūmenin on altı sehmi mezbûre Ümmühani’ye ve elli altı sehmi mezbûr Salih’e isâbet eylediği şer‘an zâhir oldukdan sonra mezbûre Ümmühani kendi tarafından asâleten ve mezbûrun kıbel-i şerden mansûbe vasîsi olmağla vesâyeten meclis-i şer‘-i hatîrde sâbıkā vasîsi olup sagīr-i mezbûr ile vasiyye-i mezbûre Ümmühani’nin hissesine vâzı‘u’l-yed olan İsa mahzarında bi’l-vesâye üzerine da‘vâ ve takrîr-i kelâm edip müteveffâ-yı mezbûrun bundan akdem mezbûrdan bi’t-tarîkı’l-mezbûr ikimize intikāl eden kasaba-i mezbûre toprağında vâki‘ mülk bağı ile dokuz bin iki yüz akçesini kabz eyledikden sonra meblağ-ı mezbûru kendi mesârifine sarf ile istihlâk edip zimmetinde deyn olmağla mezbûrdan taleb ederin suâl olunsun dedikde gıbbe’s-suâl mezbûr İsa cevâbında fi’l-vâki‘ sagīr-i mezbûr ile vasiyye-i mezbûre[nin] bi-tarîkı’l-münâsaha yetmiş iki sehm hisselerine isâbet eden bağ-ı mezbûr ile meblağ-ı mezbûru kabz eyledikden sonra müceddeden binâ eylediğim mülk menzilime sarf ile istihlâk edip zimmetimde deyn olmağla meblağ-ı mezbûrdan sagīr-i mezbûrun elli altı sehm hissesine isâbet eden akçeyi ben i‘mal ve ribhini vasiyye-i mezbûre Ümmühani’ye verdim deyü ikrâr edecek ikrârı mûcebince meblağ-ı mezbûru vasiyye-i mezbûre Ümmühani’ye edâ ve teslîme ve bağ-ı mezbûru dahi mahâllinde kabza mezbûreyi taslîte mezbûr İsa’ya tenbîh olunup mâ-vaka‘a bi’t-taleb ketb olundu. Fi’l-yevmi’l-hâdî aşer min-Recebi’l-ferd li-sene isneyn ve seb‘în ve elf. Şuhûdu’l-hâl: es-Sâbıkūn.