İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 138 Hüküm no: 63 Orijinal metin no: [6b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi b. Pir Mehmed’in alacak hususunda Fatma bt. Hasan ile sulh olduğu Mahmiye-i İstanbul’da Yenibahçe kurbünde Baş mahallesi sükkânından Hasan Çelebi b. Pir Mehmed meclis-i şer‘-i hatîrde mahmiye-i mezbûrede Kefeli mahallesinde sâkine fahrü’l-muhadderât Fâtıma Hatun bt. Hasan’ın kayınanası ve tarafından husûs-ı âti’l-beyâna vekîl olup mezbûre ma‘rifet-i şer‘iye ile ârifân Sefer Beşe b. Ahmed ve Halil Beşe b. Mehmed şehâdetleri ile şer‘an vekâleti sâbite olan fahrü’l-cüyûş Mustafa Çavuş b. Mahmud mahzarında ikrâr ve i‘tirâf edip mezkûre Fâtıma Hatun zimmetinde cihet-i karz-ı şer‘îden on sekiz bin akçe hakkım olup meblağ-ı mezbûru mezbûreden taleb ve da‘vâ eylediğimde inkâr etmeğin beynimizde münâza‘ât-ı kesîre ve muhâsamât-ı şedîde vukū‘undan sonra vesâtet-i müslihîn ile da‘vâ-yı mezkûremden vekîl-i mezbûr beni üç bin fıddî râyic fi’l-vakt akçe üzerine inşâ-i akd-i sulh etdikde ben dahi sulh-ı mezbûru kabûl ve bedel-i sulh olan meblağ-ı mezbûru tamamen meclis-i şer‘de vekîl-i mezbûr yedinde ahz u kabz ve mâ‘adâdan mezkûreyi ibrâ-i âmm-ı kātı‘u’n-nizâ‘ ile ibrâ ve ıskāt edip min-ba‘d mezbûre Fâtıma kıbelinden benim için vechen mine’l-vücûh ve sebeben mine’l-esbâb hak ve alâka kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Recebi’l-ferd li-sene isneyn ve seb‘în ve elf. Şuhûdu’l-hâl: Mehmed Çavuş b. Mustafa el-mübâşir, es-Seyyid Ahmed Efendi b. es-Seyyid Mehmed el-kādî, Ömer b. İlyas, Mustafa Çelebi b. Mehmed, Hasan Beşe b. ( ) çukadâr, Mustafa b. Mehmed, Mustafa Efendi el-imâm, Ahmed b. İlyas.