İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 139 Hüküm no: 64 Orijinal metin no: [6b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbaz Marat v. Vartan’ın Kirkos v. Avanos’tan bin beş yüz akçe alacağı olduğu Mahrûse-i Galata i‘mâlinden kasaba-i Beşiktaş’da Mahmud Ağa fırınında habbâz olan işbu bâ‘isü’s-sifr Marat v. Vartan nâm zimmî mahfil-i kazâda yine tâife-i mezbûreden Kirkos v. Avanos muvâcehesinde üzerine da‘vâ edip bundan akdem mezbûr Kirkos bin beş yüz akçe ikrâz ol dahi iktirâz ve kabz etdikden sonra meblağ-ı mezbûr zimmetinde lâzımü’l-edâ deyni olduğunu şuhûd-ı udûl katında ikrâr dahi etmişdir hâlâ edâdan imtinâ‘ eder suâl olunup alıverilmek matlûbumdur dedikde gıbbe’s-suâl mezbûr Kirkos husûs-ı mezbûru bi’l-külliye inkâr edicek müdde‘î-i mezbûrdan da‘vâsını mübeyyine beyyine taleb olundukda tâife-i mezbûreden David v. Şâkir ve Andriya v. Marat nâm zimmîler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Kirkos bizim huzûrumuzda merkūm Marat’a bin beş yüz akçe zimmetimde deynim vardır deyü bi-tav‘ihiikrâr eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle oldukdan sonra müdde‘î-i mezbûr Marat’a meblağ-ı mezbûr bin beş yüz akçeyi edâ ve teslîme mezbûr Kirkos’a tenbîh olunup mâ-vaka‘a bi’t-taleb ketb olundu. Fi’l-yevmi’l-âşir min-Receb li-sene isneteyn ve seb‘în ve elf. Şuhûdu’l-hâl: Ahmed Çelebi b. Mahmud kethudâ-i muhzırân, Abdi Çelebi b. Hüseyin, Ahmed b. Abdülcabbar, Rasûl b. Rıdvan, Şükrullah b. Mustafa ve gayruhum.