İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 140 Hüküm no: 65 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Ali’nin kefaletinden dolayı alacaklı olduğu Mirza Çelebi b. Musa ile sulh olduğu Mahmiye-i İstanbul’da Zeyrek câmi‘i kurbünde sâkin Hüseyin b. Ali nâm kimesne meclis-i şer‘-i hatîr-i lâzımü’t-tevkīrde Mirza Çelebi b. Musa mahzarında ikrâr ve takrîr-i kelâm edip bundan akdem Ahıska Paşası olup vefât eden Frenk Ahmed Paşa b. Abdullah zimmetinde deyn-i şer‘îden olan bin dört yüz riyâlî guruş hakkım mezbûr Mirza Çelebi emr ve kabûlü hâviye kefâletle kefîl oldukdan sonra meblağ-ı mezbûrun kırk riyâlî guruşunu hâl-i sıhhatinde Paşa-yı müşârün-ileyhden alıp mâ‘adâ bin üç yüz altmış guruşun ahz etmedin Paşa-yı müşârün-ileyh medyûnen fevt olup meblağ-ı mezbûrun altı yüz riyâlî guruşu kefîl-i mezbûrdan da‘vâ eylediğimde mezbûr Mirza Çelebi vech-i muharrer üzere kefâletini ikrâr eyledikden sonra beynimizde muslihûn tavassut etmekle da‘vâ-yı merkūmeden an-ikrâr-ı mezbûr Mirza Çelebi benimle yirmi bin akçe üzerine sulh olup ben dahi vech-i meşrûh üzere sulh-ı mezbûru kabûl ve bedel-i sulh olan yirmi bin akçeyi yedinden kabz meblağ-ı mezbûr bin üç yüz altmış riyâlî guruşa kefâleti da‘vâsından mezbûr Mirza Çelebi’nin zimmetini ibrâ ve ıskāt eyledim min-ba‘d benden veyâ vekîlimden meblağ-ı merkūme müte‘allika da‘vâ sudûr ederse lede’l-hükkâm mesmû‘a olmasın dedikde gıbbe’t-tasdîk mâ hüve’l-vâki‘ bi’t-taleb kaydolundu. Fi’s-sânî aşer min-Recebi’l-ferd sene [10]72. Şuhûdu’l-hâl: İbrahim Çelebi b. Mehmed el-yesârî, Mehmed Ağa b. Mahmud, Kadri Beşe b. el-Hâc Hanefî, Abdülhalim Beşe b. Fazlullah, Hamza Çavuş el-mübâşir, el-Hâc Mehmed b. Ahmed.