İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 140 Hüküm no: 66 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Sütçü Beşir’in ölmeden önce kölesi Salih ile cariyesi Vildan’ı azat ettiğinin şahitlerle ispat olunduğu Mukaddemâ katl olunan Südcü Beşir’in hüccetidir. Dîvân-ı kāimmakām-ı sadrazamîde ma‘kūd meclis-i şer‘-i hatîrde Havâss-ı Aliyye kazâsı muzâfâtından Terkos nâhiyesine tâbi‘ Hacımaşlı nâm karyede Südcü Beşir Çiftliği’nde sâkin işbu uzun boylu açık kaşlı sarı elâ gözlü Gürciyyü’l-asl Salih b. Abdullah kendi tarafından asâleten ve hemşîresi Vildan bt. Abdullah tarafından sâbitü’l-vekâle vekîl olmağın vekâleten meclis-i ma‘kūd-ı mezbûrda bundan akdem vefât eden mezbûr Südcü Beşir’in hasran vârisi olan sulbiye kızı Ümmühani’nin da‘vâ-yı âtiyede husûmet ve redd-i cevâba vekîli olup mezbûrenin zâtını ma‘rifet-i şer‘iye ile ârifân olan Mahmud Çelebi b. Abdullah ve Siyavuş Bey b. Abdullah şehâdetleri ile şer‘an vekâleti sâbite olan Şeyh Hasan Efendi b. Abdullah Efendi mahzarında üzerine takrîr-i da‘vâ edip müteveffâ-yı mezbûr Südcü Beşir’in ben abd-i memlûkü olup vefâtından bir sene mukaddem beni hasbeten lillâhi’l-hallâk tahrîr ve i‘tâk edip ben sâir ahrâr-ı asliyyîn gibi hür olup ve hemşîrem müvekkile-i mezbûreyi dahi vaty edip Mustafa nâm bir oğlu olup da‘vet etmekle hemşîrem dahi ümm-i veledi oldukdan sonra oğlu fevt olmağla müvekkile-i mezbûra rık olmak üzere benimle müvekkilem mezbûre Vildan’a vaz‘-ı yed edip suâl olunup kasr-ı yedinde tenbîh ve sebîlim tahliye olunmak matlûbumdur dedikde gıbbe’s-suâl vekîl-i mezbûr cevâbında müdde‘î-i mezbûrun müdde‘asını inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i ricâl-i Müslimînden olup karye-i mezbûre sükkânından Bayram b. Abdullah ve Handan Bey b. Abdullah ve Mustafa b. Süleyman ve Mahmud b. Abdullah nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ müteveffâ-yı mezbûr Südcü Beşir vefâtından bir sene mukaddem huzûrumuz[da] abd-i memlûkü müdde‘î-i mezbûru hasbeten lillâh tahrîr ve i‘tâk câriyesi memlûke-i mezbûre Vildan’dan tevellüd edip ba‘dehû vefât eden Mustafa’yı hîn-i tevellüdünde bendendir deyü da‘vet etmekle mezbûre Vildan dahi müteveffâ-yı mezbûrun ümm-i veledi olmağla hürre olmuşdur biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle oldukdan sonra vekîl-i mezbûr mezbûrân Salih ve kız karındaşı Vildan’ın minvâl-i muharrer üzere hür olduklarını ikrâr etmeğin mûcebince müdde‘î-i mezbûr ile kız karındaşı mezbûre Vildan’ın ıtkına hüküm birle mâ-vaka‘a bi’t-taleb ketb olundu. Fi’l-yevmi’l-hâmis min-Recebi’l-ferd li-sene isneyn ve seb‘în ve elf. Şuhûdu’l-hâl: Fahrü’l-akrân Mehmed Ağa, Ali b. Mehmed, Mustafa Çelebi b. İsmail, Ahmed Çelebi Dellâlzâde b. Mustafa, Mustafa Çelebi b. ( ) Yorgancızâde, Ahmed Çelebi b. Yusuf, Hasan Çelebi b. Musa, Ahmed Çelebi b. Musa.