İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 141 Hüküm no: 67 Orijinal metin no: [7a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Dilaver Beşe’nin muhâlaa yoluyla kocası Mahmud Efendi b. Ramazan’dan boşandığı Husûs-ı âti’l-beyânın mahâllinde tahrîri iltimâs olunmağın kıbel-i şer‘den Mevlânâ Mehmed Efendi irsâl olunup ol dahi mahmiye-i İstanbul’da Hoca Hayreddin mahallesinde vâki‘ Birinci odalarında sâkine Hadîce bt. Dilaver Beşe nâm hatunun sâkine olduğu menziline varıp zeyl-i kitâbda mastûrü’l-esâmî olan Müslimîn huzûrunda akd-i meclis-i şer‘-i şerîf eyledikde mezbûre Hadice’nin meclis-i ma‘kūd-ı mezbûrda zevci işbu râfi‘u’l-kitâb Müezzin Mahmud Efendi b. Ramazan mahzarında ikrâr ve takrîr-i kelâm edip zevcim mezbûr Mahmud Efendi zimmetinde mütekarrir ve ma‘kūdün-aleyh olan üç bin akçe mehr-i müeccelimi bi’t-tamam ve’l-kemâl yedinden ahz u kabz etdikden sonra nafaka-i iddet ve meûnet-i süknâm dahi kendi üzerime olmak üzere zevcim mezbûr Mahmud Efendi ile muhâla‘a-i sahîha-i şer’iyye ile muhâla‘a edip ol dahi hul‘-ı mezbûru kabûl etdikden sonra zevciyete ve gayra müte‘allika âmme-i de‘âvî ve mütâlebât ve eymân ve muhâsamâtdan her birimiz âharın zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledik dedikde gıbbe’t-tasdîkı’ş-şer‘î vâki‘ hâl mevlânâ-yı mezbûr mahâllinde tahrîr ba‘dehû irsâl olunan Mehmed b. Ramazan ile meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min-Recebi’l-ferd li-sene isneyn ve seb‘în ve elf. Şuhûdu’l-hâl: Receb Efendi b. Mehmed, Mustafa Efendi b. Mehmed, Hüseyin Halîfe b. Receb bi’l-mahalleti’l-mezbûre, Ali b. Hüseyin, Ahmed b. Hasan Bey.