İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 142 Hüküm no: 68 Orijinal metin no: [7a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe b. Mustafa’nın oğluna kefaletinden dolayı Hatice bt. Abdullah’tan üç yüz akçe alacaklı olduğu Mahmiye-i İstanbul’da Haydarpaşa mahallesi ahâlîsinden hâfızü’l-vesîka Mehmed Beşe b. Mustafa meclis-i şer‘de Hadîce bt. Abdullah mahzarında üzerine da‘vâ ve takrîr-i kelâm edip târih-i kitâbdan iki sene mukaddem mezbûr Hadîce Hatun’un sadrî oğlu gāib ani’l-meclis Mustafa Çelebi zimmetinde benden iştirâ ve kabz eylediği câriye semeni yüz seksen riyâlî guruş ile iktirâz ve kabz eylediği yüz yirmi riyâlî guruş hakkıma mezbûre Hadîce Hatun kefîl olmuş idi el-hâletü hâzihî meblağ-ı mezbûru kefâleten mezbûre Hadîce Hatun’dan taleb ederim suâl olunsun dedikde gıbbe’s-suâl mezbûre Hadîce Hatun cevâbında fi’l-vâki‘ sadrî oğlum mezbûr Mustafa Çelebi’nin mezbûr Mehmed Beşe’ye bâlâda beyân ve tafsîl olunduğu üzere üç yüz -kırk beş- riyâlî guruş deynine kefîl olup meblağ-ı mezbûru Ramazan-ı câ’î gurresinde edâ ve teslîme ahd eyledim deyü ikrâr edecek ikrârı mûcebince meblağ-ı mezbûru kefâleten müdde‘î-i mezbûra edâya mezbûre Hadîce Hatun’a tenbîh birle mâ hüve’l-vâki‘ bi’t-taleb ketb olundu. Fi’r-râbi‘ aşer min-Recebi’l-ferd li-sene isneyn ve seb‘în ve elf. Şuhûdu’l-hâl: Hüseyin Efendi b. ( ) el-Burûsî, Ahmed Efendi el-kādî, Keşfî Mustafa Efendi, Şükrullah b. Mustafa, Abdi b. Hüseyin, Rasûl b. Rıdvan.