İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 142 Hüküm no: 69 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Efendi b. Mehmed’in menzilini Emrullah Ağa b. Nurullah’a sattığı Mahmiye-i İstanbul’da Sarı Musa sâkinlerinden olup bi’l-fi‘il Dergâh-ı âlî yeniçerilerinden sekbânlar kâtibi olan Ali Efendi b. Mehmed meclis-i şer‘de hâfızü’l-kitâb Emrullah Ağa b. Nurullah mahzarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafı Solak Ahmed Çelebi mülküne ve bir tarafı el-Hâc Mehmed veresesi mülkü ve bir tarafı Çorbacı Ahmed Ağa mülkü ve bir tarafı tarîk-i hâs ile mahdûd iki bâb tahtânî oda ve orta sofa ve iki su kuyusu ve bir mahzeni ve bir mikdâr arsa-i hâliyeyi müştemil menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mezbûr Emrullah Ağa’ya beheri sekizer dirhem guruş olmak üzere altı yüz riyâlî guruşa tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm ol dahi vech-i meşrûh üzere iştirâ ve tesellüm ve kabûl etdikden sonra semeni olan meblağ-ı mezbûr altı yüz riyâlî guruşu mezbûr Emrullah Ağa yedinden bi’t-tamam ve’l-kemâl ahz u kabz eyledim ba‘de’l-yevm menzil-i mahdûd-ı mezkûr mezbûr Emrullah Ağa’nın mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîk mâ-vaka‘a bi’t-taleb ketb olundu. Fi’l-âşir min-Recebi’l-ferd li-sene isneyn ve seb‘în ve elf. Şuhûdu’l-hâl: Ders-i âm İsa Efendi, Yusuf Ağa b. Abdullah, Ahmed b. Süleyman, Nurullah Ağa b. Abdullah, Mehmed Beşe b. Abdullah, Ahmed Efendi b. el-Hâc İbrahim, Abdülkadir Çelebi b. ( ) el-Burûsî, Ahmed Efendi b. Hanefî. Şuhûd: