İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 143 Hüküm no: 70 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülbaki’nin menzilini annesi Saime bt. Ahmed kiraladığı Mahmiye-i İstanbul’da Harâccı Muhyiddin mahallesinde sâkin bundan akdem fevt olan Hasan nâm kimesnenin li-ebeveyn karındaşı Abdülbaki nâm sagīrin kıbel-i şer‘den mansûb vasîsi olan Muslı Beşe b. ( ) meclis-i şerde sagīr-i mezbûrun vâlidesi bâ‘isetü’l-kitâb Saime bt. Ahmed nâm hatun tarafından husûs-ı âti’z-zikri tasdîka vekîl olup mezbûrenin zâtını ma‘rifet-i şer‘iye ile ârifân Mustafa Bey b. Mehmed ve Osman b. Hüseyin şehâdetleri ile şer‘an vekâleti sâbite olan Ümmühani bt. Ahmed mahzarında bi’l-vesâye ikrâr ve i‘tirâf edip sagīr-i mezbûrun karındaşı müteveffâ-yı mezbûrdan müntakil mülkü olup mahalle-i mezbûrede vâki‘ bir tarafı Yusuf Hoca menziline ve bir tarafı Ahmed menziline ve bir tarafı el-Hâc Mahmud menziline ve bir tarafı tarîk-i âmma müntehî menzili müvekkile-i mezbûreye yevmî dörder akçe ücret ile îcâr ve teslîm ol dahi vech-i muharrer üzere istîcâr ve kabûl ve kabz eyledi dedikde gıbbe’t-tasdîk mâ-vaka‘a bi’t-taleb ketb olundu. Fi’s-sâmin min-Recebi’l-ferd li-sene isneyn ve seb‘în ve elf. Şuhûdu’l-hâl: Şükrullah b. Mustafa, Rasûl b. Rıdvan, Hasan b. Bayram, Mehmed b. Ramazan, Hasan b. Bayram.