İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 143 Hüküm no: 71 Orijinal metin no: [7b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan’ın veraset taksimi Mahmiye-i İstanbul’da Harâccı Muhyiddin mahallesinden olup bundan akdem fevt olan Hasan’ın verâseti vâlidesi Saime bt. Ahmed ve li-ebeveyn karındaşı Abdülbaki nâm sagīre münhasıra olduğu şer‘an zâhir ve asl-ı meselesi üç sehimden olup sihâm-ı mezbûrenin bir sehmi mezbûre Saime’ye ve iki sehmi merkūm Abdülbaki’ye isâbet eylediği bâhir oldukdan sonra mezbûre Saime Hatun tarafından husûs-ı âti’z-zikre vekîl olup mezbûrenin zâtını ma‘rifet-i şer‘iye ile ârifân Mustafa Bey b. Ahmed ve Osman Çelebi b. Hasan şehâdetleri ile şer‘an vekâleti sâbite olan Ümmühani bt. Ahmed nâm hatun meclis-i şer‘de sagīr-i mezbûrun kıbel-i şer‘den mansûb vasîsi olan Muslı Beşe b. ( ) mahzarında bi’l-vekâle ikrâr ve i‘tirâf edip müvekkilem mezbûre Saime Hatun oğlu müteveffâ-yı mezbûrun terekesinden olup vasîyy-i mezbûrun makbûzu olan iki yüz altmış esedî guruşdan üç sehimden bir sehm hissesine isâbet eden seksen altı esedî guruş ile seksen akçeyi vasîyy-i mezbûr Muslı Beşe yedinden bi’t-tamam ahz u kabz edip yedinde bir akçe ve bir habbe hakkı bâkī kalmadı dedikde gıbbe’t-tasdîk mâ-vaka‘a bi’t-taleb ketb olundu. Fi’s-sâmin min-Recebi’l-ferd li-sene isneyn ve seb‘în ve elf. es-Sâbıkūn.