İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 144 Hüküm no: 73 Orijinal metin no: [7b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Receb’in Çukurbostan mahallesindeki menzil ve bahçesini oğlu Hacı Ahmed b. Hacı Mehmed’e sattığı Mahmiye-i İstanbul’da Sultan Selim kurbünde Çukurbostan mahallesinde sâkine Fâtıma bt. Receb nâm hatun meclis-i şer‘de sadrî kebîr oğlu bâ‘isü’l-vesîka el-Hâc Ahmed b. el-Hâc Mehmed mahzarında ikrâr ve takrîr-i kelâm edip mahalle-i mezbûrede vâki‘ bir tarafdan el-Hâc Ahmed nâm kimesne menziline ve bir tarafdan el-Hâc Mehmed menziline ve bir tarafdan merhûm Sivâsî Efendi bahçesine ve taraf-ı râbi‘i tarîk-i âm ile mahdûd tahtânî iki oda ve fevkānî iki oda ve bir su kuyusunu ve kenîfi ve havluyu müştemil olup arsalarının merkūm Sivâsî Efendi Vakfı’na beher sene yetmiş akçe mukāta‘aları olan mülk menzilim ile eşcâr-ı müsmire ve gayr-ı müsmireyi hâvî menzil-i mezbûra muttasıl mülk cüneynemi bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık tarafeynden îcâb ve kabûlü hâvî bey‘-ı bâtt-ı sahîh-i şer‘î ile on bin fıddî râyic fi’l-vakt akçeye oğlum mezbûr el-Hâc Ahmed’e safka-i vâhide ile bey‘ ve teslîm edip ol dahi minvâl-i muharrer üzere iştirâ ve tesellüm ve kabûl eyledikden sonra semenleri olan meblağ-ı mezkûrun iki bin akçesini yedinden alıp kabz edip meblağ-ı bâkī sekiz bin akçemi târih-i kitâbdan üç yüz altmış gün tamamına değin tecîl-i şer‘î ile tecîl eyledim min-ba‘d menzil-i mahdûd-ı mezkûr ve cüneyne oğlum mezbûrun mülk-i müşterâsıdır keyfe mâ yeşâ mutasarrıf olsun dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’l-âşir min-Recebi’l-ferd li-sene isneyn ve seb‘în ve elf. Şuhûdu’l-hâl: Ali Efendi b. Mehmed el-imâm, Mehmed Halîfe b. Ali el-müezzin, Bayram Beşe b. Mehmed, Abdülaziz b. Şaban, Mehmed b. Halid, Bayram b. Mustafa, el-Hâc Yusuf el-müezzin, Mustafa b. Mehmed, Abdi Çelebi b. Hüseyin, Şükrullah b. Mustafa, Rasûl b. Rıdvan, Veli b. Mahmud.