İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 145 Hüküm no: 74 Orijinal metin no: [7b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan bt. Abdullah’ın kocasının muhallefatından hissesini almak üzere İsmail Beşe b. Mustafa’yı vekil tayin ettiği Mahmiye-i İstanbul’da Mollahüsrev mahallesi sükkânından olup Eflak Vilâyeti’nde ticâret üzere iken vefât eden İbrahim Beşe b. Abdullah’ın zevce-i metrûkesi Sultan bt. Abdullah nâm hatun tarafından husûs-ı âti’l-beyânı ikrâra vekîl olup mezbûrenin zâtını ma‘rifet-i şer‘iye ile ârifân mahalle-i mezkûre sükkânından Mustafa b. Yusuf ve Ahmed Beşe b. Musa nâm kimesneler şehâdetleri ile şer‘an vekâleti sâbite olan Salih Efendi b. Kurt nâm kimesne mahfil-i kazada işbu bâ‘isü’l-kitâb İsmail Beşe b. Mustafa mahzarında takrîr-i kelâm edip müteveffâ-yı mezbûrun sulbî kebîr oğlu Mehmed nâm kimesnenin müvekkilem mezbûre ile müteveffâ-yı mezbûrun terekesine müte‘allika da‘vâsı olmağla mezbûr İsmail Beşe’yi tarafından husûmet ve redd-i cevâba ve müteveffâ-yı mezbûrun terekesinden olup sâir kimesneler zimmetlerinde olan haklarında kendüye isâbet eden semeni hisse-i şer‘iyesini dahi da‘vâ ve taleb ve ahz u kabza ve kendüye îsâle ve ahz u îsâl[in] mütevakkıf olduğu umûrun cümlesine ve iktizâ ederse sulh ve ibrâya vekîl nasb ü tayin eyledim dedi dedikde ol dahi vekâlet-i mezbûreyi kabûl ve hizmet-i lâzımesini edâya ta‘ahhüd etmeğin mâ-vaka‘a bi’t-taleb ketb olundu. Fi’l-âşir min-Recebi’l-ferd li-sene isneyn ve seb‘în ve elf. Şuhûdu’l-hâl: el-Hâc Ahmed b. Mahmud, Abdi Çelebi b. Hüseyin, Veli b. Mahmud, Ahmed b. Abdülcabbar, Rasûl b. Rıdvan.