İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 149 Hüküm no: 82 Orijinal metin no: [8a-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Muslı’nın bazı eşyalarını azatlı cariyesi Demürhan’a hibe ettiği Mahmiye-i İstanbul’da Mimar Sinan mahallesinde sâkine Âişe Hatun bt. Muslı meclis-i şer‘de câriye-i mu‘takası işbu râfi‘atü’l-kitâb Demürhan bt. Abdullah mahzarında ikrâr ve takrîr-i kelâm edip silk-i mülkümde olan eşyâmdan bir minder ve iki yasdık ve bir yemenî yorgan ve bir döşek ve bir bez destgâhı mükemmel ve bir siyah ve bir beyâz Yanbolu kebesi ve bir tencere ve bir sahan ve bir sepet sandık ve bir alacak kilimimi câriye-i mu‘takam mezbûre Demürhan’a hîbe ve temlîk ve teslîm ol dahi meclis-i hîbede ittihâb ve kabûl eyledi ba‘de’l-yevm eşyâ-i merkūme mezbûre Demürhan’ın mülk-i mevhûbudur mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’r-râbi‘ aşer min-Recebi’l-ferd li-sene isneyn ve seb‘în ve elf. Şuhûdu’l-hâl: Abdurrahman Efendi b. Ahmed el-imâm, Hekîmzâde Mehmed Efendi b. Mustafa, Abdülbaki Çelebi b. Abdülkerim, Pîrî Çelebi b. Mustafa, Ahmed b. Mehmed, İsmail Beşe b. Hasan, Hüseyin Çelebi b. Veli, Halil Bey b. Pîrî.