İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 149 Hüküm no: 83 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nurludede mahallesinde tamire muhtaç olan Ayşe Hatun bt. Yusuf’un vakf ettiği evin vakfın menfaati için Sefer Bey’e satılması Husûs-ı âti’l-beyânın mahâllinde tahrîri iltimâs olunmağın cânib-i şer‘den Mevlânâ es-Seyyid İbrahim Efendi irsâl olunup ol dahi zeyl-i vesîkada muharrerü’l-esâmî Müslimîn ile mahmiye-i İstanbul mahallâtından Nurlu Dede mahallesinde vâki‘ merhûme Âişe Hatun bt. Yusuf nâm sahibü’l-hayrın vakf süknâsına vakfiyesinde kendiden sonra evlâdına ba‘dehûm utekāsına şart ve ta‘yîn ve sâkin olan kimesne senede bir hatm-i şerîf tilâvet ve sevâbını rûh-ı vâkıfeye hediye etmek üzere tansîs eylediği bir tarafdan Râbia Hatun mülkü ve bir tarafdan Ümmühan ve Hadîce nâm hatunlar mülkleri ve bir tarafdan Medîne-i Münevvere vakfı ve ba‘zan zikri âtî Sefer Bey mülkü ve bir tarafdan tarîk-i hâs ile mahdûd ve tahtânî üç bâb ve fevkānî iki bâb odaları ve bir sofa ve bi’r-i mâ ve cüneyne ve havluyu müştemil vakf menzile varıp akd-i meclis-i şer‘ eyledikde meclis-i ma‘kūd-ı mezbûrda menzil-i mevkūf-ı mezbûr ber-mûceb-i şart-ı vâkıfe mutasarrıfe olan vâkıfe-i mezbûrenin kızı Hadîce bt. Ali nâm hatun işbu bâ‘isü’l-kitâb Sefer Bey b. Ali mahzarında ikrâr ve takrîr-i kelâm edip menzil-i mezbûrda ile’l-ân şart-ı vâkıfe üzerine sâkine idim. Lâkin ben fakīre olup menzil-i mevkūf-ı mezbûrun harâbe işrâfı müte‘ayyin ve benim dahi ta‘mîre adem-i iktidârım mütebeyyin olduğundan mâ‘adâ teberrü‘ât tasavvuru dahi olmamağla menzil-i mezbûr âhara icâre-i mu‘accele ile îcâr olunmak vakf-ı mezbûra enfa‘ olmağın mezbûr Sefer Bey’e menzil-i mezbûrda olan hakk-ı süknâmı on dört bin akçe bedel mukābelesinde hüsn-i ihtiyârım ile fâriğa olup ol dahi kabûl eyledikden sonra bedel-i ferâğ ve tefvîz olan meblağ-ı mezbûr on dört bin akçeyi yedinden bi’t-tamam ahz ü kabz eyledim ba‘de’l-yevm mülk-i müfevvazıdır keyfe mâ yeşâ ve yahtâr mutasarrıf olsun dedikde mukırre-i mezbûreyi cârî olan ikrârına el-mukarru lehu’l-mezbûr Sefer Bey vicâhen tasdîk ve şifâhen tahkīk eylediğine Mevlânâ-yı mezbûr mahâllinde tahrîr ba‘demâ irsâl olunan Halil bin Davud nâm kimesne ile meclis-i şer‘a gelip alâ-vukū‘ihî inhâ ve takrîr etmeğin vâki‘ hâl bi’t-taleb ketb olundu. Fi’r-râbi‘ aşer min-Recebi’l-ferd li-sene isneyn ve seb‘în ve elf. Şuhûdü’l-hâl: Mehmed Efendi bin Oruc el-imâm, Mehmed Halîfe el-müezzin, Mehmed b. Mustafa birâder-i mezbûr, Mustafa Efendi b. Mehmed, Mustafa Bey el-cündî, Mustafa Beşe b. Abdullah er-râcil, Ahmed Çelebi b. Abdurrahman, İbrahim b. Mehmed.