İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 150 Hüküm no: 84 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Mehmed’in İsmail b. Abdullah’tan aldığı borç parayı ödemesi için tenbih edilmesi Mahrûse-i Galata’ya tâbi‘ kasaba-i Kasımpaşa’da Sinan Paşa mahallesinde sâkin işbu râfi‘u’l-kitâb İbrahim Çavuş b. Mehmed nâm kimesne mahfil-i kazâda İsmihan bt. Mehmed nâm hatun tarafından husûs-ı âti’l-beyâna vekîl olup nehc-i şer‘ üzere vekâleti sâbite olan zevci Mehmed Beşe b. Süleyman mahzarında üzerine da‘vâ ve takrîr-i kelâm edip müvekkile-i mezbûre İsmihan târih-i kitâbdan üç sene mukaddem gāib ani’l-meclis İsmail b. Abdullah nâm kimesneden yüz riyâlî guruş istikrâz ve kabz ol dahi ikrâz ve tesellüm etdikden sonra ben ve zevci mezbûr Mehmed Beşe ve gāibân ani’l-meclis Behram b. Abdullah ve Âişe bt. Abdullah nâm kimesneler ile her birimiz meblağ-ı mezbûr yüz yirmi riyâlî guruşa emr ve kabûlü hâviye kefâlet-i sahîha-i şer‘iye ile kefîl olmuş idik. Mezkûr İsmail fevt olmağla vârisleri meblağ-ı mezbûr yüz yirmi riyâlî guruşu kefâleten benden da‘vâ ve taleb ve ben dahi inkâr eyledikde veresesi dahi huzûr-ı hâkim-i şer‘de benim kefîl olduğumu şuhûd-ı udûl ile isbât edip min-ciheti’l-kefâle meblağ-ı mezbûru edâya hükm-i şer‘î lâhık oldukdan sonra ben dahi meblağ-ı mezbûru edâ ve teslîm etmiş idim. Hâlâ kefâleten edâ eylediğim meblağ-ı mezbûru müvekkile-i mezbûre İsmihan’dan taleb ederim suâl olunsun dedikde mezbûr Mehmed Beşe cevâbında fi’l-vâki‘ müdde‘î-yi mezbûr İbrahim Çavuş ile ben ve gāibân ani’l-meclis mezbûrân Behram ve Âişe ile zevcem mezkûre İsmihan zimmetinde cihet-i mezbûreden olan yüz yirmi riyâlî guruşu her birimiz emr ve kabûlü hâviye kefâlet-i sahîha-i şer‘iye ile kefîl olmuş idik. Lâkin meblağ-ı mezbûr yüz yirmi riyâlî guruşu müdde‘î-yi mezbûra bi-hükmi’l-kefâle ben edâ ve teslîm eyledim deyü def‘le mukābele edecek gıbbe’l-istintâk ve akībe’l-inkâr mezkûr Mehmed Beşe’den def‘-i mezbûrunu mübeyyin beyyine taleb olundukda ityân-ı beyyineden izhâr-ı acz edip istihlâf etmeğin müdde‘î-yi mezbûr İbrahim Çavuş’a mezkûr Mehmed Beşe’den meblağ-ı mezbûr [yüz] yirmi riyâlî guruşu ahz u kabz etmediğine yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin meblağ-ı mezbûr yüz yirmi riyâlî guruşu ikrârı mûcebince müdde‘î-yi mezbûr İbrahim Çavuş’a edâ ve teslîm müvekkile-i mezbûre İsmihan Hatun’a tenbîh birle mâ-vaka‘a bi’t-taleb ketb olundu. Fi’l-yevmi’s-sâbi‘ min-Recebi’l-ferd li-sene isneyn ve seb‘în ve elf. Şuhûdü’l-hâl: Mehmed Çavuş b. Ömer el-mübâşir, İvaz Beşe b. Ahmed el-mübâşir, Şükrullah b. Mustafa, Abdi Çelebi b. Hüseyin, Rasûl b. Rıdvan.