İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 157 Hüküm no: 95 Orijinal metin no: [9b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Macar asıllı cariye Handan’ın Afife Hatun tarafında azat edildiği Itknâme. Mahmiye-i İstanbul’da Küçükkaraman’da vâki‘ merhûm Hâfız Paşa Câmi‘-i şerîfi kurbünde sâkine Afife nâm hatunun tarafından ikrâr-ı âti’z-zikre vekîl olup bi-mâ hüve nehcü’s-sübût şer‘an vekâleti sâbite olan mezbûrenin babası fahrü’l-kuzât İznikî Ahmed Efendi b. eş-Şeyh Sinan mahfil-i şer‘de müvekkile-i mezbûrenin i‘tâk-ı âtî sudûruna değin silk-i mülk-i sahîhinde münselik olan işbu açık kaşlı uzun boylu gök gözlü Macariyetü’l-asl hâfizetü’l-vesîka Handan bt. Abdullah nâm câriye-i memlûkesi mahzarında vekâleten ikrâr ve takrîr-i kelâm edip kızım mezbûre Afife mevsûfe-i merkūme Handan’ı hasbeten lillâhi’l-hallâk mâlından tahrîr ve i‘tâk ve zümre-i harâ’ir-i asliyâta idrâc ve ilhâk eyledi min-ba‘d mezbûre Handan sâir harâ’ir-i asliyât gibi hürre olup üzerinde velâdan gayrı hak ve alâkası kalmamışdır dedikde mâ-vaka‘a bi’t-taleb ketb olundu. Fi’s-sâdis aşer min-Recebi’l-ferd li-sene isneyn ve seb‘în ve elf. Şuhûdü’l-hâl: Fahrü’l-müderrisîni’l-kirâm Mehmed Efendi el-med‘uv bi Ali Çelebizâde Efendi, Mehmed Efendi b. Sinan el-kādî, es-Seyyid Mustafa Çelebi b. Nurullah el-müderris, Seyyid Yahya Çelebi b. Seyyid Hüseyin Efendi, Yusuf Çelebi tâbi‘-i Ali Çelebi Vahid Efendi, İbrahim Çelebi b. Ali, Mahmud Beşe er-râcil