İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 158 Hüküm no: 96 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirmasti mahallesinde Havva Hatun bt. Abdullah’ın varislerine kalan evin Şeyhîzâde Abdurrahman Efendi’ye satışı Şeyhîzâde Abdurrahman Efendi’nin mülknâmesidir. Dârü’s-saltanati’s-seniyye-i Kostantıniyyeti’l-mahmiye’de Kirmasti mahallesinde sâkine iken bundan akdem vefât eden Havva Hatun bt. Abdullah’ın verâseti anasının anası Kerîme Hatun bt. ve li-ebeveyn karındaşları Fâtıma ve Emine ve Sâliha’ya münhasıra ve tashîh meselesi on beş sehm i‘tibâr olunup sihâm-ı mezbûrenin üç sehmi mezbûre Kerîme Hatun’a ve dörder sehmi mezbûrâtdan her birine isâbet etdiği şer‘an mütehakkık oldukdan sonra mezbûrât taraflarından ber-vech-i âtî bey‘ ve kabz-ı semene iddi‘â-i vekâlet eden merhûm-ı mefharet-nişân Sultan Mehmed Han tâbe serâhu hazretleri türbedârı Receb Efendi b. Mehmed meclis-i şer‘de işbu kitâb-ı sedâd intisâbın sahibi a‘lâmü’l-ulemâ’i’l-mütebahhirîn efdalü’l-fudalâi’l-müte’ahhirîn yenbû‘u’l-fezâil ve meâli menbû‘ü’l-efâzıl ve’l-e‘âlî el-müstağnî zâtuhü’ş-şerîf an-ıtnâbi illâ yukâbilü’l-elkāb [an-ıtnâbi’l-elkāb] yeftehiru bi zâlike’l-cenâb ağnî bihi hazret-i Abdurrahman Efendi eş-şehîr bi Şeyhîzâde enâllâhu mâ erâdehû taraf-ı ‘izzet-i şerîflerinden da‘vâ-yı âtiyede husûmet ve redd-i cevâba vekîl olup fahrü’l-kuzât Muslu Efendi b. Musa ve Seyyid İbrahim Efendi şehâdetleri ile şer‘an vekâleti sâbite olan fahrü’l-a‘yân Ali Ağa b. Oruc mahzarında bi’l-vekâle ikrâr ve takrîr-i kelâm edip müvekkilelerimin akd-i âtî sudûruna değin silk-i mülk-i sahîhlerinde münselik olup mahalle-i mezbûrda vâki‘ bir tarafdan Muhzır Kalaycı Ali Çelebi mülküne ve bir tarafdan İmâm Şaban Efendi tasarrufunda olan menzile ve bir tarafdan müşârün-ileyh efendi hazretleri mülküne ve bir tarafdan tarîk-i âmma müntehî iki bâb fevkānî odayı ve üç sofalı ve iki bâb tahtânî odalı ve bir matbah ve bir bi’r-i mâ ve cüneyneyi müştemil olup tashîh-i mezbûr üzere mezbûrât Kerîme ve Fâtıma ve Emine ve Sâliha’nın menzil-i mahdûd-ı mezkûrda olan sihâm-ı şâyi‘aları bi-cümleti’t-tevâbi‘ ve’l-levâhık kâffetü’l-hukūk ve’l-merâfık bundan akdem müşârün-ileyh Abdurrahman Efendi hazretlerinin üzerinde ba‘de’l-müzâyede ve inkıtâ‘-ı rağbe semen-i misli olan yetmiş iki bin râyic-i fi’l-vakt akçede karâr etdikden sonra müşârün-ileyh hazretlerine meblağ-ı mezbûr yetmiş iki bin akçeye bâtten bey‘ ve teslîm ol dahi iştirâ ve tesellüm etmiş idi. El-hâletü-hâzihî vekîl-i mezbûr Ali Ağa’dan suâl olunup semen-i mezbûrun alıverilmesi murâdımdır dedikde gıbbe’s-suâl vekîl-i mezbûr cevâbında fi’l-vâki‘ müvekkil-i mûmâ-ileyhin menzil-i mahdûd-ı mezbûru vech-i mübeyyen üzere iştirâ ve tesellümü ikrâr lâkin vekîl-i mezbûrun mezbûrât kıbellerinden menzil-i mahdûd-ı mezbûru meblağ-ı mezbûr yetmiş iki bin akçeye bey‘ ve kabz-ı semene vekâletini inkâr edicek vekîl-i mezbûr Receb Efendi’den mezbûrât taraflarından vech-i meşrûh üzere vekîl olduğuna beyyine taleb olundukda udûl-i ricâl-i ahrâr-ı Müslimînden olup mahmiye-i mezbûrede Sinan Ağa mahallesinde sâkin fahrü’l-eimme Salih Efendi b. Hasan ve Nasuh Halîfe b. Oruc ve Bayram Beşe b. Maksud nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ mezbûrât Kerîme ve Fâtıma ve Emine ve Sâliha menzil-i mezkûrda olan sihâm-ı şâyi‘alarını mûmâ-ileyh efendi hazretlerine meblağ-ı mezbûr yetmiş iki bin akçeye bey‘ ve kabz-ı semene bizim huzûrumuzda mezbûr Receb Efendi’yi taraflarından vekîl nasb ve ol dahi vekâleti kabûl eyledi. Biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm mezbûr Receb Efendi meclis-i mezbûrda semen-i mezbûru merkūm Ali Ağa yedinden bi’t-tamam ve’l-kemâl ahz u kabz etmeğin mâ-vaka‘a bi’t-taleb ketb olundu. Fi’l-yevmi’s-sânî işrîn min-Recebi’l-ferd li-sene isneyn ve seb‘în ve elf. Şuhûdü’l-hâl: Fahrü’l-müderrisîn Mustafa Efendi b. Ahmed, Fahrü’l-eimme Şaban Efendi el-imâm bi Câmi‘-i Sultan Mehmed el- gāzi, Fahrü’l-eimme Abdullah Efendi b. Şaban Efendi, Muharrirü’l-hurûf Ahmed Efendi eş-şehîr bi Mehmedzâde, İbrahim Çelebi el-müezzin, Fahrü’l-müderrisîn Mustafa Efendi, Ahmed Efendi kâtib-i kassâm Mehmed Efendi b. Mahmud Kâtib-i muhâsebe, Keşfî Mustafa Efendi el-müderris, Ahmed Efendi b. el-Hâc İbrahim, Mehmed Efendi b. Abdülbaki, el-Hâc Ahmed b. Mahmud.