İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 159 Hüküm no: 97 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mahmud vakfı parasından aldığı borca karşılık kiralama yoluyla evini vakfa veren Mehmed Çelebi b. Ali’nin borcu İkrâr-ı deyn. Mahmiye-i İstanbul’da Manisalı Çelebi mahallesi ahâlîsinden olup Muhzır Hacı Mehmed vakfı olan nukūdun hâlâ mütevellîsi hâfızü’l-kitâb Mustafa Çelebi b. Ahmed nâm kimesne meclis-i şer‘de Mehmed Çelebi b. Ali’nin mahzarında bi’t-tevliye üzerine da‘vâ ve takrîr-i kelâm edip mezbûr mukaddemâ vakf-ı mezbûrdan yedinden karz aldığı beş bin akçeye mahalle-i mezbûrede vâki‘ lede’l-ahâlî ma‘lûmü’l-hudûd arsası ve binâsı mülk menzilini bi-tarîkı’l-istiğlâl bey‘ ve teslîm ve ba‘de’t-tahliyeti’ş-şer‘iye ücret-i ma‘lûmeye istîcâr eyledikden sonra bin akçesini yedinden kabz edip zimmetinde bâkī kalan dört bin akçeyi mezbûr[dan] taleb ederin suâl olunsun dedikde gıbbe’s-suâl mezbûr Mehmed Çelebi cevâbında fi’l-vâki‘ ber-minvâl-i muharrer vakf-ı mezbûrdan mütevellî-yi merkūm yedinden iktirâz ve kabz eylediğim beş bin akçeye menzil-i mezbûru bi-tarîkı’l-istiğlâl bey‘ ve teslîm ve ba‘de’t-tahliyeti’ş-şer‘iye ücret-i ma‘lûme ile istîcâr ve tesellüm eylediğimden sonra bin akçesini cânib-i vakfa edâ edip dört bin akçesin zimmetimde lâzımü’l-edâ deyndir deyü tav‘an ikrâr edicek ikrârı mûcebince meblağ-ı mezbûr dört bin akçeyi cânib-i vakf-ı mezbûra edâya mezbûr Mehmed Çelebi’ye tenbîh olunup mâ hüve’l-vâki‘ bi’t-taleb ketb olundu. Fi’s-sâbi‘ ve’l-işrîn min-Recebi’l-ferd li-sene isneyn ve seb‘în ve elf. Şuhûdü’l-hâl: Mustafa Efendi el-müderris, Hüseyin Efendi el-Burûsî, Keşfî Mustafa Efendi, Şükrullah Beşe b. Mustafa el-muhzır, Abdi Çelebi b. Hüseyin, Mustafa Çelebi b. Ali.