İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 161 Hüküm no: 99 Orijinal metin no: [10a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bulûğa erdiğini iddia ederek babası Bakkal Abaza Abdullah b. Abdülmennan’dan kalan mirası vasîsi Receb Çelebi’den isteyen İbrahim’in talebinin reddedildiği İbkāya tenbîh. Mahmiye-i İstanbul’da Hoca Hayreddin mahallesinden olup mukaddemâ vefât eden Bakkal Abaza Abdullah b. Abdülmennan’nın veresesinin bulûğa tahammülü olmayıp bulûğu iddi‘â eden sulbî oğlu İbrahim meclis-i şer‘de vasîyy-i muhtârı Receb Çelebi b. Mehmed mahzarında takrîr-i kelâm edip mezbûr Receb Çelebi babam müteveffâ-yı mezbûr bin altmış altı Recebi gurresinde vefât eyledikde ber-mûceb-i defter-i kassâm kendi hissem olan kırk iki bin sekiz yüz kırk altı akçeyi vesâyeten kabz eyledikden sonra hasbî nâzıram olan işbu vâlidem talebi ile bin yetmiş senesi Receb’inde kassâm-ı askerî olan Abdülhalim Efendi mezbûrun muhâsebesini görüp yedine imzâ ve hâtemini hâvî defter verip zikrolunan defterde mezbûrun i‘mâli ile hâsıl olan yirmi yedi bin akçe fâide ile asl-ı mâl cem‘an altmış dokuz bin yüz kırk altı akçe olup meblağ-ı mezbûrun sekiz bin akçesine Rüstem Paşa sûkunda olup harîk-i kebîrde muhterik olan bakkāl dükkânı ta‘mîrine ve üç bin akçesini dükkân-ı mezbûr âriyen intikāl eyledikde intikāl için mütevellîsine ve üç bin akçe dahi muhterik olan nısf mülk menzilim ta‘mîrine ve altı yüz akçesin muhâsebe ve defter harcı için verip cem‘an on dört bin altı yüz akçe ihrâc olundukdan sonra yedinde bâkī kalan elli dört bin beş yüz kırk altı akçeyi bâliğ ve reşîd olmağla mezbûrdan taleb ederim suâl olunsun dedikde gıbbe’s-suâl mezbûr Receb Çelebi cevâbında fi’l-vâki‘ işbu defter nâtık olduğu üzere ba‘de’l-ihrâcât elli dört bin beş yüz kırk altı akçe yedimde mevcûd olup lâkin cüssesinin bulûğa tahammülü olmadığı zâhir olup bulûğuna i‘tirâfı mesmû‘ ve makbûl olmamağla meblağ-ı mezbûru vermem deyü teslîmden imtinâ‘ etmekle mezbûrun cüssesinin bulûğa tahammülü olmadığı lede’ş-şer‘ zâhir olmağla hâkim-i muvakki‘-i sadr-ı kitâb tûbâ-lehû ve hüsnü-meâb hazretleri bulûğuna i‘tirâfı kabûl etmeyip meblağ-ı mezbûru vasîyy-i mezbûr yedinde ibkâya tenbîh birle mâ-vaka‘a bi’t-taleb ketb olundu. Fi’l-yevmi’l-hâmis ve’l-işrîn min-Recebi’l-ferd li-sene isneyn ve seb‘în ve elf. Şuhûdü’l-hâl: Ahmed Çelebi b. Mahmud pazarbaşı sâbıkā, Abdurrahman b. Himmet, Osman Hoca b. Abdullah, Mahmud Beşe b. Himmet, Hüseyin Beşe er-râcil, Küçük Mehmed b. Himmet, Şükrullah b. Mustafa, Ahmed Çelebi b. Muharrem.