İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 161 Hüküm no: 100 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacamescid mahallesinde sakin Kırk sekizinci orta yeniçerilerinin para vakfının muhasebesi İkrâr-ı Deyn Husûs-ı âti’l-beyânın mahâllinde tahrîr[i] iltimâs olunmağın cânib-i şer‘den Mevlânâ es-Seyyid İbrahim Efendi b. Mehmed irsâl olunup ol dahi zeyl-i vesîkada mastûrü’l-esâmî Müslimîn ile mahmiye-i İstanbul mahallâtından Alaca Mescid mahallesinde sâkin olup yeniçeri tâifesinin eski odalarında kırk sekizinci ağa bölüğü odası cemâ‘atinin orta akçesi demekle ma‘rûf yüz altmış bin akçe nukūd-ı mevkūfelerine mütevellî olan el-Hâc Sefer Beşe b. Ahmed nâm kimesnenin mülk menziline varıp akd-i meclis-i şer‘ eyledikde zikri sebk eden oda cemâ‘atinden nukūd-ı mezkûreye hasbî nâzır olanlardan mezbûr odanın odabaşısı Mustafa Beşe b. Ali ve Hüseyin b. Malkoç ve Mehmed Beşe b. Yusuf ve İlyas Beşe b. İbrahim ve Ahmed Beşe b. Mustafa ve diğer Ahmed Beşe b. Ali ve Receb Beşe b. Rıdvan nâm kimesneler ve sâirleri meclis-i ma‘kūd-ı mezbûrda mezbûr el-Hâc Sefer mahzarında her biri bi’l-vekâle üzerine takrîr ve da‘vâ edip mezbûr el-Hâc Sefer nukūd-ı mezbûreye bundan akdem cümlemiz ma‘rifetiyle bin altmış üç senesinde mütevellî oldukda asl-ı mal-ı mezbûr yüz altmış bin akçe kabz ve irbâh ve târih-i mezbûreden bin altmış bir senesine gelince her on akçesin on bir akçe hesâbı üzere murâbahasını bi’t-tamam ahz u kabz eyleyip hâlâ mezbûrun zimmetinde asl-ı mal-ı mezbûr yüz altmış bin akçe ve hesâb-ı mezbûr üzere murâbahasını dahi bir senede on altı bin akçe ki cem‘an yüz yetmiş altı bin akçe eder mezbûrun zimmetindedir suâl olunup nezâretimiz hasebiyle ba‘de’l-ikrâr ikrârı tahrîr olunması matlûbumuz dediklerinde gıbbe’s-suâl mütevellî-yi mezbûr cevâbında fi’l-vâki‘ târih-i mezbûrda ben nukūd-ı merkūmeye mütevellî olup tevliyetim hasebiyle asl-ı mal-ı mezbûr yüz altmış bin akçe ve bir sene murâbahası dahi on altı bin akçe ki cem‘an yüz altmış altı bin akçe zimmetimde vâcibü’l-edâ ve lâzımü’l-kazâ deynimdir deyü bi’t-tav‘i’s-sâf ikrâr ve i‘tirâf eylediğini Mevlânâ-yı mezbûr mahâllinde ketb ve ba‘dehû ma‘an irsâl olunan Ahmed b. Mehmed nâm kimesne ile meclis-i şer‘a gelip alâ-vukū‘ihî inhâ ve takrîr etmeğin vâki‘u’l-hâl bi’t-taleb ketb olundu. Fi’t-tâsi‘ ve’l-işrîn min-Recebi’l-ferd li-sene isneyn ve seb‘în ve elf. Şuhûdü’l-hâl: es-Seyyid Cafer Çelebi b. es-Seyyid Hüseyin, İsmail Beşe b. İbrahim, Musa Efendi b. Durak imâm, İbrahim b. Yakub el-mübâşir, Veli b. Yusuf el-kayyum, Mehmed b. Ali seroda, Hasan Efendi b. Mustafa, B 49