İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 162 Hüküm no: 101 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in vasîsi olduğu oğlu Ahmed’e ait arsanın satışı Mülknâme Mahmiye-i İstanbul’da Kazganî Sâfî mahallesinde sâkin iken bundan akdem vefât eden Emin Piyale b. Abdullah’ın verâseti zevce-i metrûkesi Âişe bt. Mehmed ile sulbî oğlu Ahmed nâm sagīre münhasıra olup asl-ı meseleleri sekiz sehimden olup sihâm-ı mezbûreden bir sehmi merkūme Âişe’ye ve yedi sehmi mezbûr Ahmed’e isâbet eylediği şer‘an zâhir ve müte‘ayyin oldukdan sonra mersûme Âişe kendi tarafından asâleten ve sagīr-i mezbûr Ahmed’in tesviye-i umûruna kıbel-i şer‘den mansûbe vasîsi olmağla vesâyeten meclis-i şer‘-i hatîrde işbu bâ‘isü’l-kitâb Mehmed Çelebi b. Hasan mahzarında ikrâr ve takrîr-i kelâm edip sagīr-i mezbûr ile bana bi-hasebi’l-irs müteveffâ-yı mezbûrdan intikāl edip mahalle-i merkūmede vâki‘ bir tarafı Esirci Veli Bey mülküne ve bir tarafı Muharrem Çavuş mülküne ve bir tarafı Yeniçeri meydânına ve bir tarafı tarîk-i âmma müntehî mülk menzil arsasını ve müşterek su kuyusunu ve tarîk-i âm tarafeyninde bir mikdâr nakzı bi-cümleti’t-tevâbi‘ ve’l-levâhık sagīr-i mezbûrun nafakaya eşedd-i ihtiyâc ile ihtiyâcı olmağın semen-i misli ile bey‘ olunup semenini i‘mâl ve hâsıl olan fâidesi sagīr-i mezbûrun nafakasına harc ve sarf olunmak sagīr hakkında enfa‘ olmağın ba‘de’l-müzâyede ve inkıtâ‘ı’r-rağbe mezbûr Mehmed Çelebi üzerinde sekiz bin akçede karâr etmekle semen-i misli olan sekiz bin akçeye asâleten ve vesâyeten mezbûr Mehmed Çelebi’ye bey‘-ı bâtt-ı sahîh-i şer‘î ile bey‘ ve temellük ve teslîm ol dahi vech-i mübeyyen üzere iştirâ ve kabûl ve kabz ve tesellüm eyledikden sonra semen-i mezbûr sekiz bin akçeyi müşteri-yi mezbûr Mehmed Çelebi yedinden tamamen ahz u kabz eyledim ba‘de’l-yevm arsa-i mahdûde-i mezkûr müşteri-yi merkūm Mehmed Çelebi’nin mülk-i müşterâsıdır keyfe mâ yeşâ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-Recebi’l-ferd sene [10]72. Şuhûdü’l-hâl: Mahmud Efendi b. Şaban el-imâm-ı Monla Şeref, İbrahim Çelebi b. Ahmed el-müezzin, Mustafa Çelebi b. Hamza, Salih Çelebi b. Hasan, Hasan b. Mehmed, Ali Dede b. Ramazan, Süleyman b. İbrahim, Mehmed b. İlyas.