İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 163 Hüküm no: 102 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan b. Murad’ın kötü halinden dolayı yaşadığı Silivrikapı İbrahimpaşa mahallesinden çıkarılması Mahalleden ihrâca ta‘ahhüd. Mahmiye-i İstanbul’da Silivrikapısı dâhilinde İbrahim Paşa mahallesinde sâkin Mehmed b. Mahmud mahfil-i kazâda mahalle-i mezkûre sükkânından câr-ı mülâsıkı olan Ramazan b. Murad nâm kimesne <> mahzarında üzerine da‘vâ ve takrîr-i kelâm edip mezbûr Ramazan kendi hâlinde olmayıp dâimâ menziline nâ-mahrem nisâ tâifesini getirip ihtilât etmekle sû’-i hâlinden müte’ezzîyim. Hâlâ kıbel-i şer‘den mahalle-i mezbûreye varıp ahâlîsinden mezbûrun ahvâli teftîş olundukdan sonra mahalle-i mezbûreden ihrâc olunması matlûbumdur dedikde kıbel-i şer‘den Mevlânâ Keşfî Mustafa Efendi irsâl olunup ol dahi mahalle-i mezbûrede vâki‘ Bali Ağa Mescid-i şerîfine varıp akd-i meclis-i şer‘-i şerîf eyledikde mahalle-i mezbûr ahâlîsinden olup zeyl-i vesîkada mastûrü’l-esâmî olan bî-garaz Müslimînden suâl eyledikde onlar dahi mezbûrun sû’-i hâlini haber verdiklerinden sonra mezbûr Ramazan dahi meclis-i ma‘kūd-ı mezbûrda takrîr-i kelâm edip ben dahi ba‘de’l-yevm mahalle-i mezbûrdan çıkıp âhar mahallede sâkin olmak üzere ta‘ahhüd eyledim dedikde vâki‘ hâli Mevlânâ-yı mezbûr mahâllinde tahrîr mahalleye ma‘an irsâl olunan Halil b. Ahmed ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 27 min-Recebi’l-ferd li-sene isneyn ve seb‘în ve elf. Şuhûdü’l-hâl: Mustafa Efendi b. İbrahim, Halil Beşe b. Mustafa, el-Hâc Abdülkadir b. Halil, Abdi Çelebi b. İskender, Ahmed Bey b. Receb, el-Hâc Mustafa b. Ali, Mehmed Çelebi b. Hasan el-müezzin, Ali Çelebi el-müezzin, Mehmed Çelebi el-müezzin.