İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 164 Hüküm no: 103 Orijinal metin no: [10b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. Abdülmennan’ın evini müştemilatıyla beraber Salih Efendi’ye sattığı Mülknâme Mahmiye-i Kostantıniyye’de Kumkapı kurbünde Çadırcı Ahmed mahallesinde sâkin fahrü’l-a‘yân Hüseyin Ağa b. Abdülmennan meclis-i şer‘-i hatîrde sâbıkā Reisülküttâb olan merhûm Mecd Mehmed Efendi’nin oğlu olup bi’l-fi‘il Âsitâne-i sa‘âdet’de hâlâ Reisülküttâb kāimmakāmı olan fahr-ı erbâbü’l-ma‘ârif ve’l-müvellâ zahr-ı ashâbü’l-avârif ve’l-e‘âlî işbu kitâbın sahibi Salih Efendi mahzarında tâyi‘an ikrâr ve takrîr-i kelâm edip akd-i âtî sudûruna değin silk-i mülkümde münselik olup mahalle-i mezbûrede vâki‘ bir tarafdan ba‘zan Ahmed Çelebi b. Abdullah mülküne ve ba‘zan mahalle-i mezbûr imâmına meşrût vakf menzile ve bir tarafdan el-Hâc Mahmud mülküne ve bir tarafdan mîrî bostan ve bir tarafdan tarîk-i hâssa müntehî ve mahdûd altı bâb fevkānî odalı ve iki dehlizi ve bir câmekânlı tahtânî hamamı ve bir matbah ve bir sofa ve iki kiler ve bir su kuyusu ve kenîfi ve ahırı ve muhavvâtayı müştemil olup arsasının Behram Ağa vakfına senede bin seksen akçe ve Ali Efendi vakfına dahi senede yedi yüz yirmi akçe mukāta‘a-i kadîmesi olup binâsı mülküm olan cemî‘ menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mûmâ-ileyh Salih Efendi’ye râyic fi’l-vakt yüz otuz iki bin akçeye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm ol dahi minvâl-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûru mûmâ-ileyh Salih Efendi yedinden tamamen alıp kabz eyledim ba‘de’l-yevm menzil-i mezbûr mûmâ-ileyh Salih Efendi’nin mülk-i müşterâsıdır. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: Hüseyin Efendi el-imâm, el-Hâc İbrahim el-müezzin, Mehmed Çelebi b. Ahmed, el-Hâc Mustafa b. Abdullah, Yağcı el-Hâc Mahmud, Halil Pehlivan Muharrem b. Mustafa, Mehmed b. İbrahim el-cündî, Mehmed b. Mustafa el-muhterem, Hamza Efendi hâce-i sıbyân, Hasan b. İbrahim, Feridun Çavuş b. Abdullah, Cafer Efendi kâtib-i dîvân, Receb Çelebi b. Mustafa, Mustafa Efendi Beylikci.